काठमाडौं, जेठ १५ । सरकारी स्वामित्वको रेडियो नेपालको प्रसारण पहुँच २०७९ फागुनसम्म ९२.० प्रतिशत पुगेको छ ।
अर्थमन्त्री डा प्रकाशशरण महतले आज संसदमा पेश गरेको चालु आर्थिक वर्षको आर्थिक सर्वेक्षण अनुसार इन्टरनेट सेवाग्राहीको घनत्व १३० दशमलव ६४ प्रतिशत पुगेको छ भने डिजिटल टेलिभिजनको पहुँच ७२.० प्रतिशत घरधुरीमा पुगेको छ ।
त्यस्तै, गोरखापत्र दैनिकबाट ३८ विभिन्न भाषामा साप्ताहिक रूपमा समाचार/लेख प्रकाशित भई सो अवधिसम्म विभिन्न भाषामा ७ हजार ९४४ पत्रपत्रिका दर्ता भएका छन् ।
यस अवधिमा सबै स्थानीय तहका कार्यालय र ६ हजार ७ सय ४३ वडा कार्यालयमा ब्रोडब्यान्ड इन्टरनेट सेवा पुगेको छ । त्यसैगरी ४ हजार ३९० स्वास्थ्य केन्द्र र ५ हजार ३१८ सामुदायिक विद्यालयमा ब्रोडब्यान्ड इन्टरनेट जडान सम्पन्न भएको छ ।
बाराको बराहक्षेत्र, अन्नपूर्ण सर्किट, मुक्तिनाथ मन्दिर परिसर, जानकी मन्दिर परिसर, पाथीभरा मन्दिर, हलेसी मन्दिर, गढीमाई मन्दिर परिसर लगायत धार्मिक तथा पर्यटकीय स्थलमा निःशुल्क वाईफाई हटस्पट उपलब्ध छ ।
Published Date: 29 May 2023
