काठमाडौं, जेठ १४ । नेपालमा जारी एनएससी काभा महिला भलिबल च्यालेन्ज कपमा आज फाइनलसहित तेस्रो स्थानको लागि प्रतिस्पर्धा हुदैछ ।
यसअघि सुरुवाती दुई संस्करणको च्याम्पियन नेपालले आज (आइतबार) घरेलु कोर्टमा उज्वेकिस्तानसँग खेल्दैछ । नेपाल सेमिफाइनलमा काजकस्तानसँग ३–२ को सेटमा पराजित हुँदै फाइनल पुग्नबाट वञ्चित बनेको थियो । अघिल्लो संस्करणको उपविजेता उज्वेकिस्तान भारतसँग ३–० को सोझो सेटमा पराजित भएको थियो ।
नेपाल र उज्वेकिस्तानबीचको खेलमा त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा बिहान ११ बजेपछि हुनेछ । घरेलु कोर्टमा हुने खेलमा नेपाल उज्वेकिस्तानलाई हराउँदै तेस्रो स्थान हासिल गर्ने लक्ष्यमा हुनेछ ।
नेपालसँग कप्तान अरुणा शाहीसँगै उषा भण्डारी, निरुता ठगुन्ना, सरस्वती चौधरी, संगम महतो, साफिया पुन र सलिना श्रेष्ठ रहेका छन् । यस्तै कामना विष्ट, पुनम चन्द, कविता भट्ट, प्रगति नाथ, रिमा कुँवर, पुजा चौधरी र शान्तिकला तामाङ छन् ।
नेपाल र उज्वेकिस्तानले गत वर्ष बंगलादेशमा भएको दोस्रो सेन्ट्रल जोनको फाइनलमा प्रतिस्पर्धा गर्दा नेपाल ३–२ को सेटमा विजयी भएको थियो । नेपाल सोही जितको लयलाई निरन्तरता दिने योजनामा कोर्टमा उत्रनेछ ।
यता, उज्वेकिस्तान पनि घरेलु समर्थकको साथ पाएको नेपाललाई पराजित गर्दै तेस्रो स्थान हासिल गर्ने लक्ष्यमा हुनेछ । उज्वेकिस्तान गत वर्ष फाइनलमा भोगेको हारको बदला लिने योजनामा हुनेछ ।
Published Date: 28 May 2023
