काठमाडौं, जेठ १४ । नेपाल धितोपत्र बोर्ड (सेबोन)बाट १९ अर्ब ८१ करोड रुपैयाँको प्रारम्भिक सार्वजनिक निष्काशन (आइपीओ) जारी गर्न २१ वटा कम्पनी स्वीकृतिको पर्खाइमा छन् ।
सेबोनका अनुसार २१ कम्पनीले ९८,६३४,०३० कित्ता प्राइमरी शेयर निष्कासन गर्न आतुर छन् । जसमध्ये सर्वोत्तम सिमेन्ट र रिलायन्स स्पिनिङ मिल्सले बुक बिल्डिङ प्रक्रियामार्फत प्राथमिक शेयर जारी गर्ने लक्ष्य लिएका छन् ।
सर्वोत्तम सिमेन्टले प्रतियुनिट ५०१ देखि ७५१ रुपैयाँ ५० रुपैयाँको दरमा २४ लाख कित्ता शेयर जारी गर्न स्वीकृति मागेको छ । त्यस्तै, रिलायन्स स्पिनिङ मिल्सले ६०८ रुपैयाँदेखि ९१२ रुपैयाँसम्मको मूल्यमा ७ लाख ७० हजार ६ सय ४० कित्ता शेयर जारी गर्न नियामकको स्वीकृति पर्खिरहेको छ ।
२१ कम्पनीमध्ये चार बीमा कम्पनीले प्रिमियम दरमा आईपीओ जारी गर्ने छन् । रिलायबल नेपाल लाइफ इन्स्योरेन्सले प्रतिसेयर २१२ रुपैयाँका दरले १२ करोड कित्ता सेयर निष्कासन गरिरहेको छ ।
सिटिजन लाइफ इन्स्योरेन्सले प्रति सेयर रु २९० को दरले ११ लाख २ लाख ५० हजार कित्ता शेयर निष्कासन गर्ने भएको छ । आइएमई लाइफ इन्स्योरेन्सले प्रतिसेयर २७६ रुपैयाँमा एक करोड २० लाख कित्ता र सन नेपाल लाइफ इन्स्योरेन्सले ९६ लाख कित्ता प्रति शेयर २५०.५५ रुपैयाँमा उपलब्ध गराउने भएको छ ।
त्यस्तै अपर लोहारे हाइड्रोपावर कम्पनी, माण्डु हाइड्रोपावर लिमिटेड, भगवती हाइड्रोपावर डेभलपमेन्ट कम्पनी लिमिटेड, एकर्ड फार्मास्युटिकल्स लिमिटेड, मनकामना इन्जिनियरिङ हाइड्रोपावर लिमिटेड र मिड सोलु हाइड्रोपावर लिमिटेड पनि सेबोनको स्वीकृतिको पर्खाइमा छन् । मुक्तिनाथ कृषि कम्पनी, सोनापुर मिनरल्स एन्ड आयल, डिस मिडिया नेटवर्क, ह्याथवे इन्भेष्टमेन्ट नेपाल, ट्रेड टावर लिमिटेड, भिजन लुम्बिनी उर्जा कम्पनी, चिर्ख्वा हाइड्रो पावर, माथिल्लो मैलुन खोला जलविद्युत र नेपाल वेयरहाउसिङ कम्पनीले पनि प्राथमिक शेयर निष्कासन गर्ने तयारीमा छन् ।