काठमाडौँ, जेठ १२ । उपाधिको दाबेदार भारतले काभा महिला भलिबल च्यालेन्ज कपको पहिलो सेमिफाइनल खेलमा उज्वेकस्तानलाई सोझो सेटमा पराजित गर्दै फाइनलमा स्थान बनाएको छ ।
शुक्रबार राष्ट्रिय खेलकुद परिषद्को कभर्ड हलमा भएको खेलमा पहिलो सेमिफाइनल खेलमा भारतले उज्वेकिस्तानलाई ३-० को साथ फाइनलमा भेट पक्का गरेको हो । भारतले २५-१७, २५-२० र २५-१५ को सोझो सेटमा जित हात पारेको हो ।
उज्वेकस्तान एक समय दोस्रो सेटमा १०-४ को सानदार सुरुवात गरेको थियो । तर भारतीय कप्तान निर्मललाई बाहिर राखेपछि भारतले खेलमा सानदार पूनरागमन गरेको थियो । यस प्रतियोगितामा सानदार प्रदर्शन गरेकी निर्मल त्यसपछि कोर्ट प्रवेश गरिनन् ।
भारतले सानदार पूनरागमन गर्नेक्रममा १५–१५ को अवस्थामा बराबरी गरेको थियो । त्यसपछि एक समय १८-१८ को बराबरीमा रहँदै उज्वेकस्तानले जितको सम्भावना देखाएको थियो । उक्त बराबरी अवस्थाबाट भारतले लगातार चार अंक जोड्दै जितको आधार तय गरेको थियो । तेस्रो सेटमा भने सहज जित हात पार्यो ।
भारतले उपाधिका लागि नेपाल र काजाकस्तानबीच खेलको विजेतासँग १४ जेठमा प्रतिस्पर्धा गर्नेछ । नेपाल र काजाकस्तानबीचको दोस्रो सेमिफाइनल पाँच बजेदेखि सुरु हुनेछ ।
नेपाल समूह ए को उपविजेता र भारत विजेताका रुपमा सेमिफाइनल पुगेका थिए । नेपालले समूहको सुरुवाती दुई खेलमा किर्गिस्तान र बंगलादेशलाई पराजित गरे पनि भारतसँग हारेको थियो । काजाकस्तानलाई हराउन सके नेपालले भारतसँग यो प्रतियोगितामा दोस्रोपल्ट खेल्नेछ ।
