काठमाडौं, जेठ १२ । काठमाडौं महानगरपालिकाका मेयर बालेन्द्र शाहले जेठ १३ गते हुने विशेष सरसफाइ कार्यक्रममा सहभागी हुन सरोकारवाला सबैलाई आग्रह गरेका छन् ।
काठमाडौं महानगरपालिकाले पदभार ग्रहण गरेको पहिलो वार्षिकोत्सवको अवसरमा मेयर बालेन्द्र शाहलगायत जनप्रतिनिधिले विशेष सरसफाइ कार्यक्रम आयोजना गर्न लागेको हो । नेपालमा नयाँ संविधान बनेपछि दोस्रो पटक स्थानीय तहको निर्वाचन भएको झण्डै एक वर्ष भइसकेको छ ।
सो अवसरमा मेयर शाहले ३२ वडाका सबै जनप्रतिनिधिलाई आ–आफ्नो क्षेत्रमा साझेदार संस्थाले सञ्चालन गर्ने सरसफाई अभियानमा समन्वय गर्न आग्रह गरेका छन् ।
शनिबार बिहान ७ बजेदेखि तीन घण्टा विशेष सरसफाइ अभियान सञ्चालन गरिने छ ।
सम्बन्धित वडाहरूले सरसफाई सामग्री उपलब्ध गराउनेछन्। सरसफाइबाट संकलन हुने फोहोर निजी क्षेत्रको सहयोगमा व्यवस्थापन गरिने महानगरपालिकाले जनाएको छ ।
