काठमाडौं, जेठ १२ । नेपाली सेनाले सञ्चालन गरेको सफा हिमाल अभियान २०२३ अन्तर्गत विभिन्न हिमालबाट झण्डै ३६ हजार किलोग्राम फोहोर संकलन भएको छ । अभियानको लक्ष्य ३५ हजार किलो फोहोर संकलन गर्ने थियो ।
सैनिक जनसम्पर्क तथा सूचना निर्देशनालयका अनुसार हालसम्म अन्नपूर्ण हिमालबाट ३ हजार ५६७ केजी, बरुन्टे हिमालबाट १८ हजार ५२० केजी र सगरमाथा र ल्होत्सेबाट १३ हजार ६२१ केजीसहित ३५ हजार ७०८ केजी संकलन भएको छ ।
यसैबीच सगरमाथा र ल्होत्से सरसफाईका लागि सगरमाथाको आधार शिविरमा तैनाथ नेपाली सेनाको टोली अभियान पूरा गरी फर्कन थालेको छ । जुन ५ मा विश्व वातावरण दिवसका दिन काठमाडौंमा औपचारिक कार्यक्रम गरी अभियानको औपचारिक समापन गरिने भएको छ ।
सरसफाइ अभियानमा नेपाली सेनाको टोलीलाई सघाउने दुई शेर्पा गाइडको मृत्यु भएको छ भने बिरामी परेका चार नेपाली सेनाका जवानलाई थप उपचारका लागि भारत लगिएको छ ।
Published Date: 26 May 2023
