काठमाडौं, वैशाख २६ । लियोनेल मेस्सी र विश्वकप विजेता अर्जेन्टिनाले लाउरेस वल्ड स्पोर्ट्स अवार्डमा स्पोर्ट्सम्यान र टिम अफ द इयरको अवार्ड जितेका छन् ।
गत नोभेम्वर र डिसेम्वरमा भएको विश्वकपको उपाधि जिताएका अर्जेन्टिनाको कप्तान समेत रहेका मेस्सीप्ले विश्वकप भर ७ गोल र गोल्डेन बल जित्न सफल भएका थिए । मेस्सी एक वर्ष टिम र व्यक्तिगत अवार्ड जित्ने पहिलो खेलाडी बनेका छन् ।
फ्रान्सेली क्लब पेरिस सेन्ट–जर्मेनका फरवार्ड ३५ वर्षीय मेस्सीले भने, ‘यो विशेष सम्मान हो । म राष्ट्रिय टोलीबाट मात्र नभई पिएसजीका मेरा सबै साथीहरूलाई धन्यवाद दिन चाहन्छु । मैले एक्लै यो कुनै पनि हासिल गरेको छैन र म उनीहरूसँग सबै कुरा साझा गर्न सक्षम भएकोमा कृतज्ञ छु ।’
निर्धारित र थप गरिएको समयमा ३–३ को बराबरी भएपछि अअर्जेन्टिनाले २०१८ को च्याम्पियन फ्रान्सलाई टाइब्रेकरमा पराजित गर्दै तेस्रोपटक विश्व च्याम्पियन बन्न सफल भएको थियो ।
उनीहरूले इङ्ल्यान्डको युरो २०२२ जित्ने लियोनेसेस, पुरुष च्याम्पियन्स लिग विजेता रियल म्याड्रिड र फ्रान्सको पुरुष सिक्स नेसन्स च्याम्पियनलाई हराएर अवार्ड जितेका थिए।
