काठमाडौं, वैशाख २५ । नेपाली राष्ट्रिय क्रिकेट टोलीका स्पिनर सन्दीप लामिछानेको सामान्य शल्यक्रिया सम्पन्न भएको छ । लामो समयदेखि दुख दिइरहेको छालाको सामान्य समस्या नेपाल नेशनल हस्पिटलमा शल्यक्रिया गरेर हटाइएको हो ।
क्रिकेट टोलीसँग पछिल्लो समय डाक्टरको भूमिकामा काम गरिरहेका डाक्टर अभिषेक राज सिंहले योजना अनुसार नै सन्दीपको शल्यक्रिया गरिएको जानकारी दिए । ‘हामीले योजना अनुसार नै शल्यक्रिया गरेका हौं । सामान्य समस्या भएकाले खेल नभएको समयमा गर्नुपर्ने थियो । अहिले विश्राम रहेकाले शल्यक्रिया गरेका हौं । भोली नै डिस्चार्ज गर्ने कार्यक्रम छ,’ सिंहले जानकारी दिए ।
सन्दीप यसै महिना सम्पन्न एसीसी प्रिमियर कपको सर्वोत्कृष्ट खेलाडी घोषित भएका थिए । नेपालले प्रतियोगिताको उपाधि जित्दै एसिया कपमा छनोट हुँदा सन्दीपले उत्कृष्ट प्रदर्शन गरे । विशेषगरी समूह चरणमा कतारविरुद्ध सन्दीपको अलराउन्ड प्रदर्शन उत्कृष्ट थियो । ब्याटिङ र बलिङ दुवैमा चम्किएका सन्दीपले नेपालको अपराजित यात्रा कायम राखेका थिए ।
Published Date: 08 May 2023
