काठमाडौं, वैशाख २४ । परराष्ट्रमन्त्री एनपी साउदले शनिबार बेलायत र उत्तरी आयरल्यान्डका राजाका रूपमा श्री ५ राजा चार्ल्स तृतीयको राज्याभिषेक समारोहमा नेपालको प्रतिनिधित्व गर्दै सरिक भएका छन् । ।
लण्डनस्थित नेपाली दूतावासका अनुसार बकिङ्घम प्यालेसमा विदेशी प्रतिनिधिका लागि आयोजना गरिएको राजाको स्वागत समारोहमा परराष्ट्रमन्त्री पनि सहभागी भएका थिए ।
सो अवसरमा मन्त्री साउदले राजा र शाही परिवारका अन्य सदस्य, बेलायती प्रधानमन्त्री ऋषि सुनक, बेलायती विदेश सचिव र बेलायती मन्त्रीहरुसँग भेटघाट र अन्तरक्रिया गरेका थिए ।
त्यस्तै, मन्त्री साउदले यस क्षेत्र र विश्वभरका नेता तथा मन्त्रीहरूसँग संक्षिप्त परामर्श गरेको दूतावासले जनाएको छ ।
राष्ट्रपति रामचन्द्र पौडेलले बेलायत र उत्तरी आयरल्यान्डका राजाका रूपमा महामहिम राजा चार्ल्स तृतीयलाई राज्याभिषेक गर्नुभएकोमा बधाई सन्देश पठाएका छन्।
शनिबार दिएको सन्देशमा राष्ट्रपति पौडेलले वातावरण संरक्षण र दिगो विकासजस्ता महत्वपूर्ण विश्वव्यापी एजेन्डामा प्रिन्स अफ वेल्सका हैसियतमा विगतमा भएका बहुमूल्य कार्यहरूको उल्लेख गरेको परराष्ट्र मन्त्रालयले जारी गरेको विज्ञप्तिमा उल्लेख छ ।
