काठमाडौं, वैशाख १९ । प्रधानमन्त्री पुष्पकमल दाहालले प्रधानमन्त्री रोजगार कार्यक्रमलाई परिमार्जन गरिने बताएका छन्। सरकारले बजेटको तयारी गरिरहेको उल्लेख गर्दै प्रधानमन्त्रीले विगतका केही कार्यक्रम परिमार्जन गरिने बताए ।
चितवनमा आयोजित एक कार्यक्रमलाई सम्बोधन गर्दै प्रधानमन्त्री दाहालले भने, ‘पहिलेका केही कार्यक्रम असफल भएका छन् जसमा प्रधानमन्त्री रोजगार कार्यक्रम पनि परेका छन् । यी कार्यक्रमहरूले अपेक्षित परिणाम दिन सकेनन्।” प्रधानमन्त्री दाहालले अनुदान कार्यक्रममा पनि परिवर्तन गर्ने तयारी गरिरहेको बताए ।
‘अहिलेको अनुदान वितरण पद्धतिका कारण खेतबारीमा काम गर्ने किसानले आवश्यक अनुदान पाएका छैनन् । किसानलाई दिइने अनुदान र अनुदानबाट बिचौलियाले मात्रै लाभान्वित भएको व्यापक रूपमा सुनिएको छ । त्यसैले यस्ता कार्यक्रम परिवर्तन गर्दैछु,’ प्रधानमन्त्री दाहालले भने । उनले आगामी आर्थिक वर्षको बजेट युवा लक्षित कार्यक्रममा लगानी गर्नेतर्फ केन्द्रित हुने बताए ।
‘हालको बजेट युवालाई सम्बोधन गरी रोजगारीका अवसर सिर्जना गर्नेतर्फ केन्द्रित छ । यो कृषिमा हुन्छ। कृषिबाट उत्पादन हुने कच्चा पदार्थमा पनि उद्योगमा आधारित लगानी केन्द्रित छ,’ उनले भने ।
