काठमाडौं, वैशाख १८ । इंग्लिस प्रिमियर लिग फुटबलमा आइतबार राति लिभरपुलले टोटेनहमलाई हराएको छ । खेलमा लिभरपुलले टोटेनहमलाई ४-३ गोल अन्तरले हराएको हो ।
खेलको तेस्रो मिनेटमा कुर्टिस जोन्सले गोल गर्दै लिभरपुललाई सुरुआती अग्रता दिलाएका थिए । त्यसै पाँचौं मिनेटमा लुइस डियाजले र १५ औं मिनेटमा मोहमद सलाहले गोल गर्दै लिभरपुलको अग्रता तेब्बर बनाए ।
खेलको ३९ औं मिनेटमा ह्यारी केनले गोल गर्दा टोटेनहमले ३-१ को स्थितिमा आयो भने खेलको ७७ औं मिनेटमा सन ह्युङ मिनले गोल गर्दै टोटेनहमलाई ३-२ को स्थितिमा ल्याए । खेलको इन्जुरी समयको तेस्रो मिनेटमा टोटेनहमका रिचार्लिसनले गोल गर्दै खेल ३-३ गोलको बराबरीमा ल्याए ।
त्यसपछि इन्जुरी समयको चौंथो मिनेटमा डिएगो जोटाले गोल गर्दै लिभरपुललाई ४-३ को जित दिलाए ।
जितसँगै लिभरपुल पाँचौं स्थानमा रहेको छ भने टोटेनहम ५४ अंक जोडेर छैटौं स्थानमा रहेको छ ।
