काठमाडौं, वैशाख ३ । विश्वको सर्वोच्च शिखर सगरमाथामा मानिसले आरोहण गरेको ७० वर्ष पूरा भएको छ । तेन्जिङ नोर्गे शेर्पा र सर एडमन्ड हिलारी सन् १९५३ मे २९ मा सगरमाथाको चुचुरो आरोहण गरेका थिए।
विश्वको सर्वोच्च शिखर सगरमाथामा मानव पाइलाको सम्झनामा नेपालमा प्लाटिनम जुबली समारोह आयोजना हुँदैछ । नेपाल पर्वतारोहण संघले आगामी जेठ १५ गते भव्यताका साथ मनाइने जानकारी दिएको छ ।
संस्कृति, पर्यटन तथा नागरिक उड्डयन मन्त्रालयका सचिव सुरेश अधिकारीको अध्यक्षतामा महोत्सव मूल आयोजक समिति गठन गरिएको छ । समितिमा नेपाल पर्यटन बोर्ड, पर्वतारोहण संघ, होटल एसोसिएसन नेपाल, ट्रेकिङ एजेन्सी एसोसिएसन अफ नेपाललगायतका प्रतिनिधि छन् ।
कार्यक्रमलाई सफलतापूर्वक अवलोकन गर्न तयारी सुरु भएको छ । तयारीका लागि क्यालेन्डर समेत तय भइसकेको एनएमएका मोहन लम्सालले बताए । ‘प्लैटिनम जुबली उत्सवलाई भव्यताका साथ मनाउन विदेशी पाहुनालाई आमन्त्रण गर्ने तयारी भइरहेको छ,’ उनले भने, ‘सगरमाथा सगरमाथाको आयोजना गरी विश्वभरका सगरमाथा आरोहीलाई आमन्त्रण गरी सम्मान गरिने छ ।
सोलुखुम्बुको खुम्जुङमा जेठ १५ गते विशेष कार्यक्रम आयोजना गरिने संघका पूर्वअध्यक्ष तथा प्रमुख सल्लाहकार आङछिरिङ शेर्पाले जानकारी दिए ।
खुम्जुङमा औपचारिक कार्यक्रम सकिएपछि काठमाडौंमा पनि छुट्टै कार्यक्रम गरिने भएको छ । आरोहीहरुको सम्मानमा र्याली र भोजको आयोजना गरिनेछ ।
यस कार्यक्रमलाई अन्तर्राष्ट्रिय सञ्चारमाध्यमले पनि चासोका साथ कभर गर्ने भएकाले प्लाटिनम जुबली उत्सवले नेपालको पर्यटनमा नयाँ लहर ल्याउने शेर्पाको विश्वास छ ।
नेपाल सगरमाथासहित ८ हजार मिटरभन्दा बढी उचाइका आठ चुचुराहरूको घर हो। हालसम्म सगरमाथाको चुचुरोमा स्वदेशी र विदेशी गरी करिब सात हजार मानिस पुगिसकेका छन् ।
आरोहीहरूबीच रेकर्ड राख्ने प्रतिस्पर्धा पनि छ । कमरिता शेर्पाले २६ पटक सगरमाथा आरोहण गरिसकेकी छन् ।
