काठमाडौं, वैशाख ३ । निजी क्षेत्रका विद्युत् उत्पादकले विगत एक वर्षमा राष्ट्रिय ग्रिडमा थप ५ सय ५२ मेगावाट विद्युत् उपलब्ध गराएको छ ।
नेपाल विद्युत् प्राधिकरणको अभिलेखले २०७९ वैशाख देखि चैतसम्म जलविद्युत र सौर्य प्लान्ट गरि एक वर्षमा निजी क्षेत्रबाट सञ्चालित ३२ वटा विद्युत् आयोजनाबाट जलविद्युत र सौर्य प्लान्ट गरि कुल ५५२.११९ मेगावाट विद्युत् आपूर्ति भएको देखाएको छ ।
निजी क्षेत्रबाट उत्पादित विद्युतमध्ये २८ जलविद्युत् आयोजनाबाट ५२३.३१९ मेगावाट र चारवटा सोलार प्लान्टबाट २८.८ मेगावाट विद्युत उत्पादन भएको थियो ।
प्राधिकरणका अनुसार ८६ मेगावाटको सोलु–दुधकोशी यस अवधिमा अनलाइन आएको सबैभन्दा ठूलो निजी क्षेत्रको लगानीको आयोजना हो ।
त्यसैगरी १५७.४७० मेगावाट क्षमताका नौ आयोजना परीक्षण उत्पादनको चरणमा छन् । जसमा १८.८ मेगावाट क्षमताका तीन सोलार प्लान्ट र १३८.६७ मेगावाटका छवटा जलविद्युत प्लान्ट रहेका छन् ।
थपिएको रकमसँगै नेपालको कुल विद्युत् स्थापना क्षमता २५३२.३६ मेगावाट पुगेको छ । यसमध्ये प्राधिकरणले ६६१ दशमलव ३४ मेगावाट र यसका सहायक कम्पनीको ४ सय ७८ दशमलव १० मेगावाट र निजी कम्पनीको उत्पादन १ हजार ३९२ दशमलव ९२ मेगावाट रहेको छ । पावर प्लान्टको परीक्षण उत्पादन सहित देशको कुल विद्युत उत्पादन २ हजार ६ सय ८९ दशमलव ८३ मेगावाट रहेको छ ।
प्राधिकरणले चालु आर्थिक वर्षको असार मसान्तसम्ममा थप १२४ दशमलव ६९८ मेगावाट विद्युत् राष्ट्रिय प्रणालीमा थपिने प्रक्षेपण गरेको छ । उत्पादन पूरा भएमा मुलुकमा कुल स्थापना क्षमता २ हजार ८१४ दशमलव ५२५ मेगावाट हुनेछ ।
अनुमान अनुसार ६.४२ मेगावाटको माथिल्लो मैलुङ ए, १४.३ मेगावाटको माथिल्लो मालुन, १४.८ मेगावाटको माथिल्लो सान्जेन, ३.२ मेगावाटको गेलुङ र ४.८ मेगावाटको खोरुङ्गा खोला जलविद्युत आयोजना चालु आर्थिक वर्षको अन्त्यसम्ममा अनलाईन हुनेछन् । त्यसैगरी ०.९७५ मेगावाटका इदी खोला, १०.३ मेगावाट डाउन पिलुवा, ३३.४ मेगावाटका लिखु–२, ४.७ मेगावाटका माथिल्लो चिरखुवा र ५.८ मेगावाटका माथिल्लो फवा आयोजनाले पनि यही अवधिमा उत्पादन सुरु गर्ने लक्ष्य राखेको छ ।
त्यसैगरी ८ मेगावाटको दुहवी सोलार, १० मेगावाटको बाकी ब्लक सोलार–१ र ८ मेगावाटको भृकुटी पीभी सोलार आयोजनाले चालु आर्थिक वर्षको अन्त्यसम्ममा उत्पादन गर्ने अनुमान गरिएको छ ।
Published Date: 16 April 2023
