काठमाडौँ, चैत २३ । नेपालमा बजाज मोटरसाइकल ब्राण्ड भित्रिएको २५ बर्षमा बजाजले ८ लाख युनिट बाइक बिक्री गरेको छ । नेपालमा बजाज मोटरसाइकलको आधिकारीक वितरक गोल्छा समुह अन्तर्गतको हंशराज हुलासले २५ बर्षमा ८ लाख युनिट बाइक बिक्री गरेको बताएको हो ।
गोल्छा अर्गनाइजेसका निर्देशक तथा अभिमन्यु गोल्छाले बजाजले २५ वर्षको अवधिमा नेपाली बजारमा मात्र ८ लाख युनिट बजाजको बाइक बिक्री गरेको जानकारी दिए ।
डिलरसम्मान कार्यक्रममा बोल्दै उनले भने ‘‘हामीले यो अवधिमा ८ लाख युनिट बाइक बिक्री गर्न सफल भएका छौं, अहिले हामीसँग ८ लाख ग्राहकहरु पुगेका छन ।” उनले यो यात्रा ५० बर्षसम्म पुग्ने बिश्वास गरेको दाबी गरे ।
बजाजले बुधबार बजाज मोटरसाइकल ब्रान्ड नेपाल भित्रिएको २५ बर्ष पुगेको अवसरमा आफ्ना डिलरहरुलाई सम्मान समेत गरेको छ ।
हाल बजाजसँग नेपालभर तीनसय डिलर र तीनसय भन्दा धेरै वर्कशपहरु रहेको गोल्छाको भनाई छ । उनका अनुसार संसारको सबैभन्दा उच्च हिमाली क्षेत्र मुस्ताङमा पनि बजाजको शोरुम पुगेको छ । नेपालमा बजाजको बाइक सन् १९९८ मा भित्रिएको थियो।
कम्पनीका अनुसार सन् २००१ नोभेम्बरमा १५० र १८० सीसी नेपाल भित्र्याएपछि बजाज नेपालमा सर्वाधिक बिक्री हुने मोटरसाइकल बनेको थियो। बजाजले अहिले डीटीएसआइ, एलएस, एएस, एनएस, एन, आरएस र एफ सिरिजमा २५० सीसी, डोमिनार लगाएका मोडल बिक्री गर्दै आएको छ ।
नेपालमा पछिल्लो समय पल्सर २२० एफ, १५० सीसी र एनसएस २०० सर्वाधिक बिक्री हुँदै आएको छ । कम्पनीले ६ महिनाभित्र बजाजको विद्युतीय स्कुटर समेत ल्याउने तयारी गरिरहेको छ ।
गोल्छा समुहले नेपालमा हाल एसेम्बल मोटरसाइकल पनि उत्पादन गर्दै आएको छ । एसेम्बल प्लाटमा गोल्छा समुहले तीन सय जना भन्दा बढीलाई रोजगारी दिएको छ ।
Published Date: 06 April 2023
