काठमाडौँ, चैत २३ । सत्तारुढ नेकपा (माओवादी केन्द्र) मा आबद्ध विभिन्न भ्रातृ संगठनले जातीय पहिचानका आधारमा कोशी प्रदेशको नाम परिवर्तन गर्न माग गर्दै प्रधानमन्त्री पुष्पकमल दाहाललाई ज्ञापनपत्र बुझाएका छन् ।
नेवा राष्ट्रिय मुक्ति मोर्चा, लिम्बुवान राष्ट्रिय मुक्ति मोर्चा जस्ता जातीय संगठनका पदाधिकारीसहितको प्रतिनिधिमण्डल बालुवाटार पुगेर कोशी प्रदेशको नाम परिवर्तन गर्न ज्ञापनपत्र बुझाएको छ ।
प्रदेश नामाकरणपछि उत्पन्न भएको अवस्थालाई वार्ताबाटै समाधान गरी आन्दोलनका क्रममा ज्यान गुमाएकाका परिवारलाई क्षतिपूर्तिको व्यवस्था गर्न भातृ संगठनले माग गरेका छन् ।
लिम्बुवान राष्ट्रिय मुक्ति मोर्चाका वरिष्ठ उपाध्यक्ष प्रेम मिवाकले जातीय पहिचानका आधारमा प्रदेशको नाम परिवर्तन गर्न सहजीकरण गरी नेतृत्वदायी भूमिका निर्वाह गर्न पार्टीले प्रधानमन्त्री दाहाललाई आग्रह गरेको बताए ।
यसअघि प्रदेशसभा बैठकमा माओवादी केन्द्रका सबै सांसदले कोशीको नामको पक्षमा मतदान गरेका थिए । तर, बुधबार बसेको पार्टी पदाधिकारीको बैठकले प्रदेशको नामलाई आधार मानेर जातीय पहिचानको पक्षमा उभिने निर्णय गरेको हो ।
Published Date: 06 April 2023
