काठमाडौं, चैत २० । नेपालले काठमाडौं–ल्हासा सीधा उडान सुचारु गर्न चिनियाँ पक्षलाई आग्रह गरेको छ । आइतबार तिब्बतको ल्हासामा भएको नेपाल–चीन सीमा व्यापार समन्वय संयन्त्रको पहिलो बैठकमा नेपालले चिनियाँ पक्षलाई यस्तो प्रस्ताव गरेको हो ।
उद्योग, वाणिज्य तथा आपूर्ति मन्त्रालयका अनुसार कोभिड–१९ का कारण दुई शहरबीचको हवाई सेवा बन्द रहेको छ । नेपाली पक्षले दुई देशबीचको पर्यटन र व्यापारलाई थप विस्तार गर्नका लागि उडान पुनः सञ्चालन गर्न चीनसँग आग्रह गरेको छ ।
मन्त्रालयका सहसचिव नारायणप्रसाद रेग्मीले चीनको नीतिअनुसार नेपालसँग सबै व्यापारिक नाका खोल्न आग्रह गरेकोमा चिनियाँ पक्ष सकारात्मक रहेको बताए । ‘हामीले हवाई सेवा सुचारु गर्न अनुरोध गरेका छौं, उहाँहरु सकारात्मक हुनुहुन्छ’, मन्त्रालयका प्रवक्ता समेत रहेका रेग्मीले भने । ‘विमानस्थलको स्तरोन्नतिको काम चलिरहेको छ र नेपालको अनुरोध अनुसार छिट्टै आवश्यक निर्णय हुन्छ ।”
ल्हासा–काठमाडौं सिधा उडान नभएकाले हाल काठमाडौं–चेङ्दु–ल्हासा र ल्हासा–चेङ्दु–काठमाडौँसम्म हवाई सेवा राउन्डअबाउट रुटमा जोडिएको छ ।
चीनमा कोरोना भाइरसको महामारी फैलिएसँगै चिनियाँ एयरलाइन्स कम्पनीहरूले जनवरी २०२० देखि विभिन्न देशको उडान बन्द गरेपछि नेपालका लागि उडान पनि रोकिएको थियो । नेपाल सरकारले कोभिड–१९ को सङ्क्रमण थप फैलिन नदिन २०२० फागुन २४ गते देशमा लकडाउन लागू गरेदेखि नै उक्त रुट बन्द गरिएको छ ।
कोभिड–१९ महामारीपछि पाँचवटा वायुसेवा कम्पनीले नेपाल र चीन जोड्ने नियमित उडान सुरु गरेका छन् । एयर चाइना र सिचुवान एयरलाइन्सले चेङ्दु-काठमाडौं, चाइना इस्टर्नबाट कुनमिङ, चाइना साउदर्नदेखि ग्वाङ्जाओ र हिमालय एयरलाइन्सले कुनमिङ र बेइजिङलाई काठमाडौं जोड्ने ग्रीष्मकालीन समयतालिका स्वीकृत गरेका छन् ।
Published Date: 03 April 2023
