काठमाडौं, चैत १७ । देशभर बिहान ८ बजेदेखि सुरु भएको यस वर्षको माध्यमिक विद्यालय परीक्षा (एसइई)को पहिलो दिन आज शान्तिपूर्ण रुपमा सम्पन्न भएको छ ।
परीक्षा नियन्त्रक विष्णुनारायण श्रेष्ठका अनुसार एसइई देशका ७७ वटै जिल्लाका २ हजार ३६ परीक्षा केन्द्र र जापानमा स्थापना गरिएको एउटा केन्द्रमा भएको थियो ।
पहिलो दिन अनिवार्य अंग्रेजी विषयको परीक्षामा सहभागी भएका थिए भने संस्कृत विषयका विद्यार्थीले अनिवार्य संस्कृत भाषा साहित्य र अनिवार्य नेपाली विषयको परीक्षा दिएका थिए ।
एसइईका लागि दर्ता भएका कुल ४८४,२२७ विद्यार्थीमध्ये ५५ दृष्टिविहीन विद्यार्थी पनि परीक्षामा सहभागी भएका थिए । परीक्षामा सहभागी हुन मुख्य परीक्षा केन्द्र नजिकै छुट्टै उपकेन्द्र बनाइएको थियो ।
त्यसैगरी विभिन्न कारणले कारागार तथा सुधार गृहमा रहेका विद्यार्थीले पनि आ–आफ्नो ठाउँबाट परीक्षा दिएको श्रेष्ठले जानकारी दिए ।
परीक्षार्थीमा जापानको केन्द्रमा परीक्षामा बसेका १४ जना विद्यार्थी पनि छन् । जापानका विद्यार्थीले जापान सरकारको स्वीकृतिमा नेपाली पाठ्यक्रम पढाउने टोकियोस्थित शैक्षिक संस्थाबाट एसइई लिइरहेको श्रेष्ठले जानकारी दिए ।