काठमाडौं, चैत १२ । नेपाल प्रहरीका नवनियुक्त महानिरीक्षक वसन्तबहादुर कुँवरले प्रहरी संगठनको आन्तरिक सुदृढीकरण आफ्नो प्राथमिकता रहेको बताएका छन् ।
आइतबार सिंहदरबारमा प्रहरी महानिरीक्षकको ब्याज लगाएपछि उनले प्रहरीमा सुधार गर्नुपर्नेमा जोड दिए । ‘प्रहरीको आन्तरिक सुदृढीकरण मेरो प्रतिबद्धता हो । म यसबाट विचलित हुने छैन,’ कुँवरले भने ।
उनले प्रहरी प्रशासन सुधारका लागि दिन गन्ने सुअवसर नरहेको समेत बताए । ‘प्रहरी कस्तो छ भन्ने कुरा लुकाउनु पर्दैन । म यी पक्षलाई लुकाएर र दबाएर प्रहरी सुधार गर्ने पक्षमा छैन । प्रहरीमा सुधार आवश्यक छ, उनले भने, ‘अब त्यसका लागि कुनै बहाना छैन ।
उनले अपराध रोकथाम र अनुसन्धानका साथै नेपाली सेना, सशस्त्र प्रहरी बल र राष्ट्रिय अनुसन्धान विभागसँग समन्वय र सहकार्य गरी देशको आन्तरिक सुरक्षा सुदृढ गर्न सक्रिय रहने बताए ।
