काठमाडौं, चैत १० । नेपाल नागरिक उड्डयन प्राधिकरण (क्यान)ले एयर ट्राफिक कन्ट्रोलर (एटीसी) लाई आपत्तिजनक शब्द प्रहार गरेको आरोपमा एक पाइलटलाई कारबाही गरेको छ ।
अन्नपूर्ण हेलिकप्टरका पाइलटले काठमाडौं–लुक्ला उडानका क्रममा एटिसीमा अश्लील शब्द प्रहार गरेको भेटिएपछि ग्राउन्डेड गरिएको क्यानका प्रवक्ता जगन्नाथ निरौलाले बताए ।
“अन्नपूर्ण हेलिकप्टरका पाइलटलाई मार्च २१, २०२३ मा काठमाडौं-लुक्ला उडानको क्रममा एटीसीहरूसँग गलत सञ्चार गरेको कारण ग्राउन्ड गरिएको थियो,” उनले भने।
त्यस्तै अन्य दुई हेलिकप्टर कम्पनी (एयर डाइनेस्टी र फिस्टेल एयर)का पाइलटलाई पनि उड्डयन सुरक्षा निर्देशिका उल्लङ्घन गरेको भन्दै ग्राउण्डेड गरिएको छ । प्रश्नमा रहेका तीनै पाइलटलाई अर्को सूचना नभएसम्म प्रतिबन्ध लगाइने उनले बताए।
Published Date: 24 March 2023
