काठमाडौं, चैत ९ । गौतमबुद्ध अन्तर्राष्ट्रिय विमानस्थलबाट नियमित उडानका लागि नेपाल वायु सेवा निगम (नेपाल एयरलाइन्स) र हिमालय एयरलाइन्सले गृहकार्य थालेका छन् ।
नेपाल नागरिक उड्डयन प्राधिकरण (क्यान)ले दुवै कम्पनीलाई भैरहवामा आफ्नो बेस राख्न र नियमित उडान सञ्चालन गर्न निर्देशन दिएको प्राधिकरणका प्रवक्ता जगन्नाथ निरौलाले बताए । जिबिआइबाट नियमित उडान सुरु गर्न दुवै कम्पनीले गृहकार्य थालिसकेका उनले बताए ।
‘उडानको शैलीसहितका कागजात बुझाउन निर्देशन दिएका छौं,’ निरौलाले भने, ‘स्लटका लागि दुवै कम्पनी प्रक्रियामा आउन बाँकी छ ।
हिमालय एयरलाइन्सले तीन महिनाअघि नियमित उडान सुरु गरेको थियो भने निगमले उडान योजना अगाडि बढाएको थियो । तर, प्रतिकूल मौसमका कारण हिमालय एयरलाइन्सले नियमित उडान स्थगित गरेको छ ।
त्यसैगरी, गत जेठदेखि नियमित व्यावसायिक उडान गर्दै आएको जजिरा एयरवेजले अहिले सातामा तीन उडान गरिरहेको छ । यो विमानस्थल करिब एक वर्षदेखि सञ्चालनमा आएको हो ।
Published Date: 23 March 2023
