जनकपुर, चैत ८ । जनकपुरमा निर्माणाधीन अन्तर्राष्ट्रिय रामजानकी रंगशाला निर्माणका लागि मधेस सरकारले दुई अर्ब रुपैयाँ लगानी गर्ने घोषणा गरेको छ ।
बुधबार रजौलमा निर्माणाधीन रंगशालाको निरीक्षण गर्दै मधेसका मुख्यमन्त्री सरोजकुमार यादवले यस्तो घोषणा गरेका हुन् ।
भारतीय प्रधानमन्त्री नरेन्द्र मोदीले घोषणा गरेको १ अर्ब रुपैयाँ र मधेस सरकारले २ अर्ब रुपैयाँ थप गरी रंगशाला निर्माण सम्पन्न गर्ने यादवले बताए ।
उनले स्वदेशमै सुविधासम्पन्न नमुना रंगशाला निर्माण गरी अन्तर्राष्ट्रिय प्रतियोगिता आयोजना गर्ने घोषणा पनि गरे ।
विसं २०७४ मा राष्ट्रिय खेलकुद परिषद्ले जनकपुरमा तीन वर्षभित्र सुविधासहितको रंगशाला निर्माण गर्न गुठी संस्थानको लक्ष्मण मन्दिरको १७ बिघा जग्गा ३० वर्षका लागि भाडामा दिएको थियो ।
त्यसबेला राष्ट्रिय खेलकुद परिषद्ले सो जग्गामा फुटबल रंगशाला, क्रिकेट रङ्गशाला र हक्की रंगशालाका साथै बहुउद्देश्यीय इनडोर कभर्ड हल, कबड्डी, खो-खो र कुस्ती तालिम केन्द्र निर्माण गर्ने योजना बनाएको थियो तर आजसम्म केही भएन ।
