भक्तपुर, चैत ४ । सहिद स्मारक ‘ए’ डिभिजन लिगमा थ्री स्टार क्लब जावलाखेल युथ क्लबसँग शुक्रबार १–० ले स्तब्ध बनेको छ ।
एन्फा कम्प्लेक्समा शुक्रबार भएको खेलमा जावलाखेलको जितमा पहिलो हाफमा एनकोटोले गरेको गोल नै निर्णायक बन्यो । उनले खेलको १५औं मिनेटमा गोल गर्न सफल भएका थिए ।
त्यसपछि थप गोल निस्कन नसक्दा जावलाखेल विजयी हुन सफल भयो । तेस्रो जितसँगै जावलाखेल ५ खेलबाट १० अंक जोडेर तेस्रो स्थानमा उक्लिएको छ । सुरुवाती दुई खेलमा जित निकालेको जावलाखेलले त्यसपछि एपिएफसँग गोलरहित बराबरी खेल्दा फ्रेन्ड्ससँग पराजित भएको थियो ।
जारी लिगमा दोस्रो हार बेहोरिसकेको थ्री स्टार ५ खेलबाट ७ अंक जोडेर छैटौं स्थानमा रहेको छ । यसअघि थ्री स्टार पहिलो खेलमा एपिएफसँग २–० ले पराजित भएको थियो । त्यसपछि फ्रेन्ड्ससँग बराबरी खेलेको थ्री स्टारले लगातार दुई जित निकालेको थियो ।
Published Date: 18 March 2023
