काठमाडौँ, पुस ९ । साताको चौथो कारोबार दिन सेयरबजार परिसूचक नेप्से सामान्य अंकले बढेको छ । बुधबार नेप्से १.३७ अंकले बढेर २ हजार ५८५.८७ विन्दुमा कायम भएको हो । बुधबार सेयरबजारमा ३३४ कम्पनीका सेयर कारोबार भएका छन् । यी मध्ये १११ कम्पनीका सेयरमूल्य बढेका छन् भने १४२ कम्पनीका सेयरमूल्यमा गिरावट आएको छ ।
आज सेयरबजारमा ७२ लाख २४ हजार ९१७ कित्ता सेयर ३ अर्ब २२ करोड ४६ लाख ६४ हजार रुपैयाँमा किनबेच भएको छ । कारोबार रकम मंगलबारको तुलनामा २० करोड ५२ लाख रुपैयाँले कमी हो । आज सेयरबजारमा सूचीकृत समूहगत परिसूचकमध्ये वाणिज्य बैंक, होटेल तथा पर्यटन, उत्पादनशील, म्युचुअल फण्ड, निर्जीवन बीमा तथा व्यापार समूहको परिसूचक सकारात्मक रहेका छन् । सबैभन्दा धेरै निर्जीवन बीमा समूहको परिसूचक ०.८७ प्रतिशतले बढेको छ ।
विकास बैंक, वित्त, जलविद्युत, लगानी, जीवन बीमा तथा अन्य समूहको परिसूचक भने ओरालो लागेका छन् । सबैभन्दा धेरै विकास बैंक समूहको परिसूचकमा ०.८५ प्रतिशतको गिरावट आएको छ । इन्फिनिटी लघुवित्त वित्तीय संस्था, नेशनल हाइड्रोपावर कम्पनी तथा हिमस्टार उर्जा कम्पनीका सेयरधनीले सबैभन्दा बढी कमाएका छन् ।
Published Date: 24 December 2025
