भक्तपुर, ३० कार्तिक । भक्तपुर नगरपालिका वडा नं. २ मा आयोजित सेवा प्रवाह तथा समसामयिक विषयक सभामा देको मिवा इतापाके आयोजना पीडित सङ्घर्ष समितिको गतिविधि प्रमुख विषयका रूपमा उठ्यो।
नगरप्रमुख सुनिल प्रजापतिले समितिले जनताको समस्या समाधानभन्दा योजनाविरोधी गतिविधि र भ्रम फैलाउने कामलाई प्राथमिकता दिएको आरोप लगाए। जग्गावालाको मागअनुसार सञ्चालन गरिएको आवास योजना नगर विकासका लागि आवश्यक रहेको भन्दै उनले सार्वजनिक र पर्ति जग्गा संरक्षण नगरपालिकाको कर्तव्य भएको स्पष्ट पारे।
वडा नं. २ का वडाध्यक्ष हरिप्रसाद बासुकलादेखि वडा नं. ६ का वडाध्यक्ष हरिराम सुवालसम्मका वक्ताहरूले पनि झूटो प्रचार र अनावश्यक विरोधले विकास कार्यमा अवरोध बनेको टिप्पणी गरे।
नेपाल क्रान्तिकारी किसान सङ्घका अध्यक्ष गङ्गाराम ज्याख्व र नेमकिपाका संयोजक गणेशप्रसाद सुवालले योजनाबारे भ्रम फैलाउने गतिविधि रोक्न आग्रह गर्दै जनताको हितमा छलफलमार्फत समस्या समाधान गर्नुपर्ने धारणा व्यक्त गरे।
कार्यक्रममा वडास्तरका प्रतिनिधिहरूले नगरपालिकाले जनताको चाहना र प्राथमिकताअनुसार विकास कार्य अघि बढाइरहेको जानकारी गराए।
Published Date: 17 November 2025
