काठमाडौं, असोज ३ । राष्ट्रिय परीक्षा बोर्डले कक्षा १२ को पूरक (मौका) परीक्षा असोज ७ र ८ गते सञ्चालन गर्ने भएको छ । यसअघि परीक्षा भदौ २८ र २९ गते गर्ने गरी तालिका सार्वजनिक गरिएको थियो। तर देशको वर्तमान परिस्थितिका कारण तालिका परिमार्जन गर्दै बोर्डले नयाँ मिति तोकेको छ ।
नयाँ तालिका अनुसार असोज ७ गते अनिवार्य अङ्ग्रेजी (००४१) विषयको परीक्षा हुनेछ । एक मात्र विषयमा परीक्षा दिने विद्यार्थीले त्यही दिन परीक्षा दिनु पर्नेछ । दुई विषयमा पूरक परीक्षा दिने विद्यार्थीलाई भने पहिलो दिन अनिवार्य अङ्ग्रेजी (००४१) र दोस्रो दिन अनिवार्य नेपाली (००२१) को परीक्षा दिनुपर्ने व्यवस्था गरिएको बोर्डले जनाएको छ ।
त्यस्तै, असोज ८ गते दुई विषयका परीक्षार्थीहरूले आफूले दिने विषयमध्येको ठूलो कोड नम्बर भएको विषयमा परीक्षा दिनुपर्नेछ। तर उक्त दिन अनिवार्य अङ्ग्रेजी (००४१) विषय भने सञ्चालन नहुने स्पष्ट गरिएको छ ।
बोर्डले परीक्षा सञ्चालनका लागि केन्द्र निर्धारण गरिसकेको जानकारी समेत दिएको छ ।
