काठमाडौं, भदौ २९ । गत भदौ २३ तथा २४ गते भएको जेन–जी प्रदर्शनका क्रममा ज्यान गुमाउने संख्या ७२ पुगेको जानकारी प्राप्त भएको छ ।
आइतवार बिहान सिंहदवारमा आयोजित प्रधानमन्त्री सुशीला कार्कीको पदभार ग्रहण कार्यक्रममा मुख्य सचिव एकनारायण अर्यालले मृतकहरुको पछिल्लो संख्याका बारेमा जानकारी गराएका हुन् ।
आन्दोलनमा परि हालसम्म ५९ जना प्रदर्शनकारी, १० जना कैदीबन्दी तथा तीन जना सुरक्षाकर्मी कुल ७२ जनाले ज्यान गुमाएका हुन् ।
मुख्य सचिव अर्यालका अनुसार प्रदर्शनका क्रममा १ सय ३४ जना प्रदर्शनकारी तथा ५७ जना प्रहरी घाइते भएका छन् ।
भ्रष्टाचार र सामाजिक सञ्जालमाथि लगाइएको प्रतिवन्धविरुद्ध भदौ २३ गते सोमवार जेन–जी पुस्ताका युवाहरु प्रदर्शनमा उत्रिएपछि नयाँ वानेश्वरको संसद भवन अघिल्तिर प्रहरीसँग झडप भएको थियो । त्यसक्रममा प्रहरीले गोली चलाउँदा पहिलो दिन नै १९ जना प्रदर्शनकारीको दुखद निधन भएको थियो ।
युवा प्रदर्शनकारीको दुखद निधन भएपछि मंगलवार बिहानैदेखि प्रदर्शन चर्किएको थियो । फलस्वरुप ठूलो मात्रामा भौतिक क्षति हुनुका साथै थप व्यक्तिहरुले ज्यान गुमाउन पुगेका थिए ।
प्रदर्शनका क्रममा ज्यान गुमाउने सबैको सनाखत हुन सकेको छैन । आगजनि गरिएका स्थानहरुमा सरसफाइ गर्ने क्रममा कतिपय शव भेटिने क्रम जारी छ ।
आइतवार बिहानमात्र चुच्चेपाटीको भाटभटेनी सुपरस्टोरमा छ जना मानिसको शव पहिचान गर्न नसकिने अवस्थामा फेला परेको छ ।
