काठमाडौं, फागुन १८ । भारतको नेसनल स्टक एक्सचेन्ज (एनएसई) मा सूचीकृत ५० वटा ठूला कम्पनीहरुको प्रदर्शन मापन गर्ने निफ्टी ५० सूचकांकले लगातार ५ महिना मासिक घाटा व्यहोरेको छ । निफ्टीको मासिक घाटाको यो श्रंखला सन् १९९६ यताकै सबैभन्दा लामो भएको रोयटर्सले लेखेको छ ।
निफ्टीको गिरवटसँगै विश्वका प्रमुख बजारहरु मध्ये भारत सबैभन्दा खराब प्रदर्शन गर्ने सेयर बजार बनेको छ । कमजोर कर्पोरेट आम्दानी, निरन्तरको विदेशी लगानी बहिर्गमन र अमेरिकी भन्सार शुल्क सम्बन्धी अनिश्चितताका कारण निफ्टी सेप्टेम्बरको उच्चतम विन्दुबाट लगभग १५ प्रतिशतले तल झरेको छ । जसले गर्दा लगानीकर्ताको सम्पतिमा करिब ८५० खर्ब भारु (लगभग १० खर्ब डलर) को गिरावट आएको छ ।
अमेरिकाको भन्सार शुल्क सम्बन्धी अनिश्चितताको वर्तमान परिदृश्यमा भारतीय बजारहरुले थप संघर्ष गर्ने विश्लेषकहरुले बताएका छन् । सेप्टेम्बरको अन्त्यदेखि विदेशी लगानीकर्ताहरुले लगभग खुद २५ अर्ब डलरको भारतीय इक्विटी बेचेका छन् । जसमध्ये ४.१ अर्ब डलर बराबरको सेयर फेब्रुअरीमा बिक्री भएको थियो ।
ठूला भन्दा स्मल क्याप र मिड क्याप स्टकहरु बढी प्रभावित भएका छन् । फेब्रुअरीमा, निफ्टी स्मल क्याप र मिड क्याप सूचकांकहरु क्रमशः १३.२ प्रतिशत र ११.३ प्रतिशतले घटेका छन् । यी सूचकांकहरु गत वर्षको रेकर्ड उच्च विन्दुबाट क्रमशः २६ प्रतिशत र २२ प्रतिशतले तल आएका छन् ।
Published Date: 02 March 2025
