काठमाडौं, माघ १ । अमेरिकी डलरको भाउले नयाँ रेकर्ड कायम गरेको छ । नेपाल राष्ट्र बैंकका अनुसार आज माघ १ गते मंगलबार १ अमेरिकी डलरको भाउ (बिक्रीदर) १३८ रुपैयाँ ८३ पैसा कायम भएको छ । यस्तै, खरिददर १३८ रुपैयाँ २३ पैसा छ । यो अहिलेसम्मकै उच्च भाउ हो । यसअघि डलरको भाउ १३७ रुपैयाँ ८५ पैसा पुगेर रेकर्ड कायम गरेको थियो ।
पछिल्लो समय डलरको तुलनामा भारतीय रुपैयाँ (भारु) पनि निरन्तर कमजोर बन्दै गएको छ । भारुसँग नेरुको स्थिर विनिमय दर कायम भएकाले भारु कमजोर हुँदा नेपाली रुपैयाँ पनि कमजोर हुने गर्छ । आयातमुखी अर्थतन्त्र भएकाले डलरको भाउ बढ्दा नेपाललाई समग्रमा घाटा बढी पर्छ ।
आयात महँगो पर्छ भने वैदेशिक ऋणको लागत पनि बढ्छ । तर विदेशबाट रेमिटेन्स पठाउनेलाई भने फाइदा हुन्छ । डलर बलियो हुँदा भारु र नेरु दुवै कमजोर बनेका छन् । भारुसँग नेरुको स्थिर विनिमयदर छ ।
राष्ट्र बैंकका अनुसार आज १ युरोको बिक्रीदर १४१ रुपैयाँ ४७ पैसा रहेको छ भने खरिददर १४० रुपैयाँ ८६ पैसा रहेको छ । बेलायती पाउन्ड १ को बिक्रीदर १६८ रुपैयाँ ३२ पैसा र खरिद दर १६७ रुपैयाँ ५९ पैसा रहेको राष्ट्र बैंकले जनाएको छ ।
त्यसैगरी, अष्ट्रेलियन डलर १ को खरिददर आज ८४ रुपैयाँ ९८ पैसा र बिक्रीदर ८५ रुपैयाँ ३५ पैसा तोकिएको छ । क्यानेडियन डलर १ को खरिददर भने ९५ रुपैयाँ ८० पैसा र बिक्रीमा ९६ रुपैयाँ २२ पैसा पाइन्छ । कतारी रियाल १ को खरिददर ३७ रुपैयाँ ९२ पैसा र बिक्रीदर ३८ रुपैयाँ ०८ पैसा रहेको राष्ट्र बैंकले जनाएको छ ।
