काठमाडौं, पुस २१ । चिनियाँ बजारमा प्रतिस्पर्धा बढ्दै गएपछि एप्पलले भारी छुटसहित आईफोन बिक्री सुरु गरेको छ । शनिबारदेखि चार दिनसम्मका लागि विशेष अफरअन्तर्गत कम्पनीले आईफोन १६ प्रो र आईफोन १६ प्रो म्याक्समा ५०० चिनियाँ युवान (करिब साढे नौ हजार रुपैयाँ) छुट दिएको हो।
चीन एप्पलका लागि सबैभन्दा ठूलो र महत्त्वपूर्ण बजार मानिन्छ । तर, पछिल्लो समय चिनियाँ कम्पनी ह्वावेका प्रिमियम स्मार्टफोनका कारण एप्पलका उत्पादनहरूको माग घट्न थालेको छ । बढ्दो प्रतिस्पर्धालाई ध्यानमा राख्दै एप्पलले पहिलो पटक आफ्नै खुद्रा च्यानलमार्फत यस्तो अफर ल्याएको हो ।
सीएनएनका अनुसार एप्पलले अघिल्लो वर्षदेखि चीनमा मौसमी अफर दिन सुरु गरेको छ । यसअघि तेस्रो पक्ष खुद्रा विक्रेतामार्फत मात्र छुट उपलब्ध गराइन्थ्यो ।
क्यानालिसको रिपोर्टअनुसार २०२४ को तेस्रो त्रैमासिकमा चीनमा एप्पलका स्मार्टफोनको ढुवानीमा ६ प्रतिशत गिरावट आएको छ। यसै अवधिमा एप्पलको बजार हिस्सा १६ प्रतिशतबाट घटेर १४ प्रतिशतमा झरेको छ ।
त्यसैबेला, ह्वावेले २४ प्रतिशत वार्षिक वृद्धि गर्दै आफ्नो बजार हिस्सा १३ प्रतिशतबाट १६ प्रतिशतमा पुर्याएको छ । अमेरिकी प्रतिबन्धका कारण प्रभावित ह्वावेले २०२३ देखि आक्रामक रूपमा नयाँ डिभाइसहरू बजारमा ल्याउँदै आफ्नो स्थान बलियो बनाएको हो ।
ह्वावेले अमेरिकी प्रतिबन्धका बाबजुद अत्याधुनिक चिप्ससहित नयाँ डिभाइसहरू उत्पादन गर्दै आएको छ । कम्पनीले हालै तीन पटक फोल्ड गर्न मिल्ने नयाँ फोन पनि ल्याएको छ ।
चिनियाँ बजारमा ह्वावेसहितका घरेलु ब्रान्डको प्रभाव बढ्दै गएपछि एप्पलले आफ्ना प्रिमियम फोनमा आकर्षक अफर ल्याएर बजारमा आफ्नो स्थान बलियो बनाउन खोजेको देखिन्छ ।
