काठमाडौं, भदौ ३१ । सुनको भाउले लगातार तेस्रो दिन नयाँ रेकर्ड कायम गरेको छ । नेपाल सुन–चाँदी व्यवसायी महासंघका अनुसार आज (भदौ ३१ गते) सोमबार छापावाल सुन प्रतितोला ५०० रुपैयाँले बढेर १ लाख ५७ हजार ३०० रुपैयाँ कायम भएको छ ।
यसअघि शुक्रबार तोलामा ३ हजार र आइतबार ५०० रुपैयाँले बढेर सुनको मुल्यमा रेकर्ड कायम भएको थियो । आइतबार छापावाल सुन प्रतितोला १ लाख ५६ हजार ८०० रुपैयाँमा कारोबार भएको थियो । ३ दिनमा भाउ तोलामा ४ हजार रुपैयाँ बढेको देखिन्छ ।
पछिल्लो समय विशेषगरीः अमेरिकी फेडरल रिजर्भले ब्याजदर घटाउने संकेत गरेपछि सुनमा लगानीकर्ता आकर्षित बनेका हुन् । ४ वर्षपछि अमेरिकामा ब्याजदर घट्ने चर्चापछि विश्वका धेरै लगानीकर्ताले सुनमा लगानी गर्दा सुनको भाउ अन्तर्राष्ट्रिय बजारमानै बढेको विश्लेषकहरुको भनाई छ ।
लगानीकर्ताहरुले सामान्यतयाः सुनलाई आर्थिक अनिश्चितताको समयमा सुरक्षित लगानी ठान्ने गरेका छन् । अर्कोतर्फ, ब्याजदर न्यून हुँदा पनि बन्डलगायतमा प्रतिफल कम हुने भएकाले लगानीकर्ताहरु सुनतर्फ आकर्षित हुन्छन् ।
यस्तै, अमेरिकी डलर मजबुत बन्दै जानु, चीनले सुन भण्डारन बढाउनु लगायतका कारणले पनि सुनको भाउ अन्तर्राष्ट्रिय बजारमानै बढेको विश्लेषकहरुको भनाई छ । मुख्यतयः अन्तर्राष्टिय बजारमा तय हुने भाउकै आधारमा नेपाली बजारमा पनि मूल्य निर्धारण हुन्छ ।
विश्व बजारमा सुनको मूल्य घट्दा वा बढ्दा त्यसको सीधा प्रभाव नेपालमा पनि पर्ने गरेको छ । आज चाँदीको भाउ पनि प्रतितोला १५ रुपैयाँले बढेर १९ सय १५ रुपैयाँ कायम भएको छ । आइतबार चाँदीको भाउ प्रतितोला १९ सय रुपैयाँ कायम रहेको थियो ।
