काठमाडौं, भदौ १८ । युनिलिभर नेपाल लिमिटेडले आर्थिक वर्ष २०७९–८० को नाफाबाट वितरण गरेको नगद लाभांश सम्बन्धित सेयरधनीको खातामा जम्मा गरिदिने तयारी गरेको छ । कम्पनीले हितग्राही खातामा उल्लेख गरिएको बैंक खातामा नगद लाभांश भुक्तानी हुने जनाएको छ । तर, लाभांश खातामा कहिलेदेखि पठाउने भनेर कम्पनीले खुलाएको छैन ।
यता, हालसम्म पनि आफ्नो सेयर भौतिक रुपमा राखेका सेयरधनीले भने डिम्याट गरी बैंक खाता अद्यावधिक गराएपछि मात्र लाभांश पाउने छन् । यसको लागि कम्पनीले हालसम्म पनि डिम्याट नगरेकालाई तत्काल सेयर डिम्याट गर्न आग्रह गरेको छ । त्यसपछि मात्र सम्बन्धित सेयरधनीको डिम्याट खातामा नगद लाभांश जम्मा हुनेछ ।
यस्तै, युनिलिभरले प्रत्येक सेयरधनीहरुलाई प्यान नम्बर, फोन वा मोबाइल नम्बर र इमेल आइडी डिम्याट खातामा अद्यावधिक गराउन पनि आग्रह गरेको छ । कम्पनीले आर्थिक वर्ष २०७९–८० को नाफाबाट प्रतिसेयर १५ सय ८० रुपैयाँका दरले नगद लाभांश वितरण गर्ने घोषणा गरेको थियो ।
