काठमाडौं, साउन ७ । अन्तर्राष्ट्रिय बजारमा सुनले सन् २०२४ मा उत्कृष्ट प्रदर्शन गरिरहेको छ । सन् २०२४ को पहिलो ६ महिनामा मात्रै भाउ करिब १३ प्रतिशतले बढेपछि सुनले अन्य प्रमुख सम्पति वर्गहरुलाई पछि पारेको वर्ल्ड गोल्ड काउन्सिलको रिपोर्टले देखाएको छ । केन्द्रीय बैंकहरुको निरन्तर खरिद, एसियाली लगानी प्रवाह, बलियो उपभोक्ता माग र भूराजनीतिक अनिश्चितताबाट सुनलाई निरन्तर फाइदा पुगेको छ ।
जसका कारण सन् २०२४ को पहिलो ६ महिनामा सुन विश्वको दोस्रो उत्कृष्ट प्रदर्शन गर्ने सम्पति वर्ग बन्न पुगेको काउन्सिलले जनाएको छ । यसअवधिमा सुनको भाउ १२.७४ प्रतिशतले बढेको थियो भने पहिलो स्थानमा रहेको अमेरिकी स्टकको भाउ १५.६४ प्रतिशतले बढेको थियो । यता, सन् २०२४ को दोस्रा ६ महिनाको सुरुवात अर्थात जुलाई महिनामा पनि सुन र अमेरिकी स्टकहरुको भाउ निरन्तरजसो बढी नै रहेको छ ।
सुनको प्रदर्शनले उदीयमान बजारहरुको प्रदर्शनलाई पनि पछि पारेको हो । उदीयमान बजारहरुको स्टकको मूल्य भने यस अवधिमा ८.४५ प्रतिशतले बढेको छ । न्यून तर अझै असहज मुद्रास्फीतिको बीच लगानीकर्ताहरु ब्याजदर कटौतीको लागि उत्सुक देखिँदा सुनको भाउमा सकारात्मक असर परेको हो । यस वर्षको दोस्रो ६ महिनाको अवधिमा ब्याजदर कटौती हुने पूर्वानुवानका कारण पहिलो ६ महिनामा सुनको भाउमा उल्लेख्य वृद्धि भएको काउन्सिलले जनाएको छ ।
यसले नै सुनको भाउलाई आगामी दिनमा डोहोर्याउनसक्ने देखिएको छ । विश्व अर्थतन्त्र र सुनले पनि अहिले उत्प्रेरकको खोजी गरिरहेको काउन्सिलको भनाई छ । र त्यो उत्प्रेरकको काम विकसित बजारहरुमा कटौती हुने ब्याजदरले गर्न सक्ने अनुमान छ । ब्याजदर कटौती भएमा पश्चिमा राष्ट्रहरुको लगानी पनि सुनमा जाने र भाउ थप बढ्न सक्ने अनुमान गरिएको छ । यद्दपि, केन्द्रीय बैंकको मागमा ठूलो गिरावट वा एसियाली लगानीकर्ताहरुले प्रोफिट बुक गर्दा सुनको प्रदर्शनमा कमी आउन सक्ने बताइएको छ ।
