काठमाडौं, माघ १५ । १०० मेगावाट क्षमताको तामाकोशी–५ जलविद्युत् आयोजना निर्माणका लागि दुई चिनियाँ कम्पनी छनोट भएका छन् ।
तामाकोशी जलविद्युत कम्पनीले जुलाई २५, २०२२ मा तामाकोशी–५ को सिभिल र हाइड्रो मेकानिकल कामको बोलपत्र आह्वान गरेको थियो । आयोजना प्रमुख विनोद भण्डारीले प्राविधिक प्रस्तावमा छनोट भएका चिनियाँ कम्पनीमध्ये सिनो हाइड्रो कर्पोरेशन लिमिटेड र चाइना गेजुवा ग्रुप कर्पोरेशन रहेको बताए ।
सिनो हाइड्रो कर्पोरेशन लिमिटेडले ४५६ मेगावाटको माथिल्लो तामाकोशी जलविद्युत आयोजनाको सिभिल वर्क निर्माण गरेको हो । चीनको सरकारी स्वामित्वको जलविद्युत इन्जिनियरिङ तथा निर्माण कम्पनीलाई १४० मेगावाटको तनहुँ भण्डारण आयोजनाको पावर हाउस निर्माणका लागि पनि अवार्ड दिइएको छ ।
त्यस्तै ६० मेगावाटको त्रिशूली थ्रीए जलविद्युत आयोजनाको सिभिल संरचना निर्माण गर्ने कम्पनी चाइना गेजुवा ग्रुप कर्पोरेसन हो । कम्पनीलाई बूढीगण्डकी जलविद्युत् आयोजना निर्माणको ठेक्का समेत दिइएको थियो । तर, पछि सरकारले उक्त सम्झौता खारेज गरेको थियो ।
भण्डारीका अनुसार अब उनीहरुले यी कम्पनीहरुको वित्तीय प्रस्ताव गर्ने हो । आयोजनाले आगामी आर्थिक वर्षदेखि निर्माण सुरु गर्ने लक्ष्य राखेको छ । ठेक्का पाएको कम्पनीलाई आगामी चार वर्षभित्र निर्माण सम्पन्न गर्ने जिम्मेवारी दिइएको छ ।
तामाकोशी–५ माथिल्लो ताकोशी जलविद्युत् आयोजनाको क्यास्केड आयोजना हो । यो इन्जिनियरिङ प्रोक्योरमेन्ट कन्स्ट्रक्सन मोडलमा निर्माण भइरहेको छ, जसमा विस्तृत डिजाइन, खरिद, निर्माण र सञ्चालनको जिम्मा विकासकर्ता कम्पनीको हुनेछ।
अर्धभण्डारण आयोजना दुई चरणमा निर्माण हुनेछ । पहिलो चरणको काम अन्तर्गत, टेन्डर मूल्याङ्कनमा छ। दोस्रो चरणमा आयोजनाले प्रसारण लाइन निर्माणलगायत इलेक्ट्रोमेकानिकल कामको बोलपत्र आह्वान गर्नेछ। आयोजनाले ८ किलोमिटर सुरुङ, विद्युत गृह, करिब २ किलोमिटर २२० केभी प्रसारण लाइन र अन्य मुख्य संरचना निर्माण गर्नुपर्नेछ ।
उक्त आयोजनामा १८ अर्ब रुपैयाँ लगानी हुने अपेक्षा गरिएको छ जसमा कर्मचारी सञ्चय कोषले ७० प्रतिशत (करिब १३ अर्ब रुपैयाँ) ऋण लगानी गर्ने सहमति गरेको छ । जनता जलविद्युत कार्यक्रम अन्तर्गत निर्माण हुन लागेको आयोजनाको बाँकी रकम सर्वसाधारणलाई शेयर जारी गरी इक्विटीबाट उठाउने भएको छ ।
