काठमाडौँ, पुस ११ । कोशी प्रदेशले प्रधानमन्त्री कप महिला टी–२० राष्ट्रिय क्रिकेट प्रतियोगितामा प्लेअफ पुग्ने सम्भावना बढाएको छ । मूलपानी क्रिकेट मैदानमा बुधबार भएको खेलमा कोशीले गण्डकी प्रदेशलाई ५५ रनले हरायो । जितको लागि एक सय चार रनको मध्यम लक्ष्य पछ्याएको गण्डकी १५ ओभरमा सबै विकेटको क्षतिमा ४८ रनमा समेटिएको थियो ।
गण्डकीकी सुमन खतिवडा अविजित २१ रन बनाउनुबाहेक अन्य खेलाडीले दोहोरो अङ्कमा रन जोड्न सकेनन् । बलिङमा कोशीकी रुविना क्षेत्रीले तीन विकेट लिईन्। सङ्गीता राई र एलिसा खडियाले दुई दुई विकेट लिईन्।
यसअघि टस जितेर पहिला ब्याटिङ रोजेको कोशीले निर्धारित २० ओभरमा आठ विकेटको क्षतिमा एक सय तीन रन बनाएको थियो । कोशीकी बिमला मलहाले सर्वाधिक २५ रन बनाईन् । लखिता राजवंशीले २२ र सङ्गीता राईले २३ रन जोडिन्।
बलिङमा गण्डकी प्रदेशकी कुसुम गोदार र सृष्टि जैशीले दुई दुई तथा आकृति तिवारी, रचना चौधरी र सुमन खतिवडाले एक एक विकेट लिईन्। जितसँगै कोशी पाँच खेलबाट आठ अङ्क जोड्दै दोस्रो स्थानमा छ । समान खेलबाट १० अङ्क बनाएको एपीएफ शीर्षस्थानमा छ । पराजित गण्डकी दुई अङ्कसहित छैटौँ स्थानमा छ ।
