काठमाडौं,माघ ५। नेपाल भेटेरिनरी एसोसिएसन (एनभिए) को आयोजनामा माघ ७ गते झण्डै १५ लाख पुरस्कार राशीको राइट टू प्रोटिन रन नामक दौड प्रतियोगिता हुने भएको छ । प्रोटिन तथा सन्तुलित आहारको महत्व लाई आम नागरिक समक्ष उजागर गर्न एनभिएले विभिन्न विधाका दौड प्रतियोगिता गर्न लागेको हो ।
प्रोटिन बारे जनचेतना अभिवृद्धि गर्ने हेतुले शनिबार ७ बजे राइट टू प्रोटिन रनको दोस्रो संस्करण गर्न लागेको नेपाल भेटेरिनरी एसोसिएसनका अध्यक्ष शीतलकाजी श्रेष्ठले जानकारी दिए । श्रेष्ठका अनुसार, प्रतियोगितामा खुल्ला हाफ म्याराथान, पुरुष १० कि.मि, महिला ५ कि.मि, १२ कक्षा सम्मका विद्यार्थीका लागि ५ कि.मि पुरुष र ३ कि.मि महिला तथा फरक क्षमता भएका व्यक्तिहरूको ह्विलचियर विधाका दौड समावेश छन । अप्रतियोगीका रूपमा ३०० भोलेन्टियर दौडमा सहभागी हुने छन ।
प्रतियोगितामा सहभागिताका लागी हालसम्म ३ हजार ६०४ जनाले नामदर्ता गराएकाछन । उनीहरू ६ वर्षदेखि ७२ वर्ष उमेर समूहका भएको श्रेष्ठले जानकारी दिए । नामदर्ता समय बाँकी रहेकाले करिब ५ हजार सहभागी हुने एनभिएले अनुमान गरेको छ ।प्रतियोगितामा सहभागी खेलाडीका लागि १२ स्थानमा पानी सँगै प्राथमिक उपचारको प्रबन्ध गरिएको छ । आकस्मिक सेवाका लागि ८ एम्बुलेन्स र ३०० स्वयंसेवक खटिने श्रेष्ठले जानकारी दिए ।
नेपाल एथ्लेटिक्स एशोसियसनको प्राविधिक सहयोगमा हुन लागेको प्रतियोगितालाई नेपाल दाना उद्योग संघ र यस अन्तर्गतका दाना उद्योगहरूको सहयोग छ । हस्पिटल पार्टनर प्रिमेरा हस्पिटल, टिकेटिङ पार्टनर इसेवा र हस्पिटालिटी पार्टनर मोरियोट होटल र फेयर फिल्ड बाइ मेरियट रहेको प्रतियोगितालाई नेपाल एथ्लेटिक एसोसिएसनले समेत मान्यता दिएको छ ।
प्रतियोगीतका लागी नामदर्ता अनलाइन बाटै गर्ने प्रबन्ध एनभिएले मिलाइएको छ । एनभिएका अध्यक्ष श्रेष्ठका अनुसार, इच्छुक व्यक्तिले इ–सेवा र फोन–पे बाट शुल्क तिरेर प्रतियोगिताका लागि नामदर्ता गराउन सक्छन ।नामदर्ताका लागि ३०० शुल्क तोकिएको र त्यस बापत सहभागीलाई टि–सर्ट र रिफ्रेसमेन्ट प्रदान गरिने श्रेष्ठले बताए ।
प्रतियोगितामा सफल प्रतियोगीलाई नगद पुरस्कार र सम्मान–पत्र सहित प्रधानमन्त्रीले सम्मान गर्ने छन । प्रतियोगितामा पाँचौं स्थान सम्म हासिल गर्ने लाई पुरस्कृत गर्ने आयोजकको तयारी छ । दौडमा कुनै स्थान नपाएका सहभागीको पनि हातखाली हुने छैन । उनीहरूलाई पनि सम्झना स्वरूप मेडल प्रदान गरिने श्रेष्ठले जानकारी दिए ।
प्रोटिनको महत्व उजागर गर्न आयोजना गरिएको प्रतियोगिताको यो दोस्रो संस्करण हो । नेपाल लगायत विश्वका बालबालिका मासु, अण्डा, दूध, माछा, गेडागुडी लगायतमा पाइने प्रोटिनको अभावले कुपोषणको शिकार हुने गरेका छन । एक तथ्यांक अनुसार, नेपालमा ५ वर्षमुनिका ४० प्रतिशत बालबालिका कुपोषण बाट ग्रस्त छन् ।
श्रेष्ठका अनुसार सबै प्रतियोगिताको कुल पुरस्कार राशी कर सहित १४ लाख ८३ हजार ३३३ रूपैयाँको छ । हाफ म्याराथनमा प्रथम पुरस्कार बिजेताको पुरस्कार राशी कर सहित १ लाख ३३ हजार ३३३ छ । दशरथ रंगशालाबाट सुरु हुने प्रतियोगिताका विजयीलाई प्रधानमन्त्री पुष्पकमल दाहालले पुरस्कृत गर्ने कार्यक्रम छ ।
