भारतमा कोरोना भाइरसको नयाँ भेरियन्ट देखिएपनि आत्तिनुपर्ने अवस्था छैन: स्वास्थ्य मन्त्रालय

काठमाडौं, पुस ५ । सरकारले भारतमा कोरोना भाइरसको नयाँ भेरियन्ट देखा परेपनि नआत्तिन सबैमा आग्रह गरेको छ ।

स्वास्थ्य तथा जनसङ्ख्या मन्त्रालयका प्रवक्ता डा प्रकाश बुढाथोकीले छिमेकी छिमेकी भारतको केरला राज्यमा कोरोना भाइरसको नयाँ संस्करण देखिएपनि आत्तिनुपर्ने अवस्था नरहेको बताए । भारतमा देखिएको संक्रमण श्वासप्रश्वास प्रणालीसँग सम्बन्धित भएकाले चिन्तित हुनुपर्ने अवस्था छैन ।

“अहिले भारत र चीनमा श्वासप्रश्वास प्रणालीसँग सम्बन्धित समस्या बढ्दै गएको छ। कोभिड–१९ को महामारीका बेला निर्माण गरिएका आईसीयू, अक्सिजन प्लान्ट र अन्य भौतिक पूर्वाधार आवश्यक परेमा प्रयोग गर्न सकिन्छ,” उनले भने।

बुढाथोकीले कोरोनाको नयाँ भेरियन्ट फेला परे पनि नयाँ भेरियन्टमा भने कुनै नयाँ लक्षण नदेखिएको बताए । नयाँ भेरियन्टमा श्वासप्रश्वाससम्बन्धी समस्यासँग सम्बन्धित लक्षण देखिएको उनले बताए ।

सीमा नाका र अन्तर्राष्ट्रिय विमानस्थलमा स्थापना गरिएका हेल्थ डेस्कलाई स्ट्यान्डबाइ अवस्थामा राखिएको छ भने श्वासप्रश्वाससम्बन्धी समस्या भएका बिरामीलाई विशेष निगरानीमा राख्न सरकारले अनुरोध गरेको उनले बताए ।

प्रवक्ता बुढाथोकीले लामो समयदेखि श्वासप्रश्वासमा समस्या भएका बिरामीलाई जीन सिक्वेन्सिङ गराउन सिफारिस गरिएको जानकारी दिए ।

विश्व स्वास्थ्य संगठनले भारतको केरला राज्यमा कोभिड १९ को नयाँ संस्करण पुष्टि गरेको छ।