काठमाडौँ, माघ ५ । बलिउड अभिनेत्री आलिया भट्टका लागि सन् २०२२ उत्कृष्ट रहृयो । उक्त वर्ष उनले अभिनय गरेका सबै फिल्म बक्स अफिसमा सुपरहिट भएका छन् । यसबाहेक २०२२ को सुरुमा आलियाले रणवीर कपूरसँग विवाह गरे । सोही वर्ष अभिनेत्री आमा बनिन् र उनले २०२२ मै हलिउड उद्योगमा काम गर्ने मौका पनि पाइन् । आलिया यसै हलिउडमा पनि डेब्यु गर्ने तयारीमा छिन् । आलिया अभिनित हलिउड डेब्यू फिल्म हार्ट अफ स्टोनको रिलिज मिति घोषणा पनि गरिएको छ ।
केही समय अगाडि आलिया भट्टले आफ्नो सामाजिक सञ्जाल अकाउन्टमा एउटा भिडियो शेयर गरेकी छन्, जसमा नेटफ्लिक्समा सन् २०२३ मा रिलिज हुने हलिउड फिल्म र सिरिजको प्रदर्शन मिति घोषणा गरिएको देखाइएको छ । यी मध्येमा आलियाले आफ्नो हलिउड डेब्यू फिल्म हार्ट अफ स्टोनको मिति सार्वजनिक गरेकी छन् । २ मिनेट २८ सेकेन्डको सो भिडियोमा १६ फिल्म र सिरिजको रिलिज मिति घोषणा गरिएको छ । भिडियोपछि ब्याकग्राउन्डमा म्युजिकसहित सबै फिल्मका छोटो क्लिप शेयर गरिएको छ । ८ नम्बरमा फिल्म ‘हार्ट अफ स्टोन’ को क्लिप सेयर गरिएको छ, जसमा आलिया भट्टको झलक पनि देखाइएको छ ।
योसँगै रिलिज मिति पनि सार्वजनिक भएको छ । यो फिल्म ११ अगस्टमा नेटफ्लिक्समा रिलिज हुनेछ । यस फिल्ममा आलिया एक्सन अवतारमा देखिने छिन् । ‘हार्ट अफ स्टोन’मा आलियाले केया धवनको भूमिका निर्वाह गरेकी छन् । फिल्मको मुख्य अभिनेत्री गैल गैडोट र जेमी डोर्ननको दमदार अभिनय देख्न सकिनेछ ।
Published Date: 19 January 2023
