काठमाडौं, मंसिर ७ । चालु आर्थिक वर्षको मौद्रिक नीति सार्वजनिक गर्ने अन्तिम तयारीमा राष्ट्र बैंक रहेको छ ।
मौद्रिक नीतिको पहिलो त्रैमासिक समीक्षाको लागि आन्तरिक तयारी लगभग अन्तिम चरणमा पुगेको नेपाल राष्ट्र बैंक आर्थिक अनुसन्धान विभागका कार्यकारी निर्देशक डा. प्रकाशकुमार श्रेष्ठले जानकारी दिए । उनले सम्भव भएसम्म यसै साता मौद्रिक नीति सार्वजनिक गर्ने गरी आन्तरिक तयारी गरिएको बताए ।
‘यसै साताभित्र मौद्रिक नीतिको पहिलो त्रैमासिक समीक्षा सार्वजनिक हुन पनि सक्छ’ उनले भने । कुनै कारणबश यो साता नभए अर्को साता सार्वजनिक हुने उनको भनाई छ । पछिल्लो समय अर्थतन्त्रमा मन्दी छाएको छ ।
आर्थिक गतीविधि लगभग ठप्प जस्तै छ । बैंक तथा वित्तीय संस्थाहरुबाट कर्जा प्रवाह हुन सकेको छैन । यस्तो अवस्थामा सबैको नजर केन्द्रीय बैंकप्रति रहेको छ ।
यसैबीच, मौद्रिक नीतिको त्रैमासिक समीक्षामार्फत अर्थतन्त्र चलायमान बनाउने चुनौती केन्द्रीय बैंकको सामूह रहेको छ । सोहीअनुसार अर्थतन्त्रका सूचकहरु अध्ययन गरेर चलायमान बनाउने गरी मौद्रिक नीतिको पहिलो त्रैमासिक समीक्षा आउँने जानकारी अनुसन्धान विभागका कार्यकारी निर्देशक श्रेष्ठले दिए ।
तथापि, पहिलो त्रैमासिक समीक्षा भएकाले खासै ठूलो नीतिगत परिवर्तन भने नहुने उनको भनाई छ । यता, केन्द्रीय बैंकले केही समय पहिलेमात्रै लघुवित्त वित्तीय संस्थाको समस्या समाधानका लागि तयार पारेको अध्ययन प्रतिवेदन सार्वजनिक गरेको थियो ।
उक्त प्रतिवेदनले दिएको केही सुझाव कार्यान्वयन मौद्रिक नीतिको पहिलो त्रैमासबाट नै गर्ने छनक केन्द्रीय बैंकले दिएको छ । मौद्रिक नीतिको त्रैमासिक समीक्षा हरेक त्रैमास समाप्त भएको ३० दिनभित्र सार्वजनिक गर्ने नियामकीय प्रावधान छ ।
सोहीअनुसार पहिलो त्रैमासिक समीक्षा कात्तिक मसान्तसम्म सार्वजनिक गर्नुपर्ने थियो । तर, उक्त महिना दसैं तथा तिहारको बिदा परेकाले मौद्रिक नीतिको त्रैमासिक समीक्षा पछाडि धकेलिएको केन्द्रीय बैंकले जनाएको छ ।
