चितवन, कार्तिक १४ । यस वर्षको दशैं बिदामा चितवन राष्ट्रिय निकुञ्जमा २० हजारभन्दा बढी पर्यटकले भ्रमण गरेको अधिकारीले बताएका छन् । कुल आगन्तुकमध्ये नेपालीको संख्या १३ हजार २ सय ३३ थियो ।
दशैं बिदामा निकुञ्जले आगन्तुकबाट रु एक करोड ८५ लाख ४० हजार राजस्व संकलन गरेको छ । विगतका वर्षको तुलनामा यस वर्ष पर्यटकको संख्या बढेको निकुञ्जले जनाएको छ ।
निकुञ्जका सूचना अधिकारी गणेशप्रसाद तिवारीले सार्क मुलुकका ७ सय ७९ पर्यटक निकुञ्जमा आएको जानकारी दिए भने अन्य मुलुकबाट ६ हजार ४८ पर्यटक आएको थियो।
निकुञ्जमा अधिकांश पर्यटक सौराहा क्षेत्रबाट प्रवेश गरेका थिए । सौराहा क्षेत्रबाट झण्डै १८ हजार पर्यटक निकुञ्ज प्रवेश गरी ४ सय ४ वटा जीप सफारी गरेको तिवारीले जानकारी दिए ।
त्यस्तै, कसारा क्षेत्रबाट करिब एक हजार एक सय पर्यटक निकुञ्जमा प्रवेश गरेका छन् । यसबाहेक माडी क्षेत्र, अमलतारी क्षेत्र र कुजौली क्षेत्रबाट पनि केही पर्यटकले निकुञ्जको भ्रमण गरेका थिए ।
यसैबीच, पछिल्लो समय सौराहा आउने विदेशीको संख्या ह्वात्तै बढेको छ । दैनिक औसतमा १ हजार ५ सय विदेशी पर्यटक आउने गरेको होटल व्यवसायीले बताएका छन् । सौराहामा पनि होटलको अकुपेन्सी ९५ प्रतिशतभन्दा बढी छ ।
दशैंपछि विदेशी पर्यटकको सङ्ख्या ह्वात्तै बढेकाले डिसेम्बरसम्म होटलको बुकिङ ७५ प्रतिशत पुगेको छ ।
Published Date: 31 October 2023
