काठमाडौँ, कार्तिक ३ । दशैंका लागि उपत्यकाबाट गाउँ फर्किनेहरुको भीड लागेको छ । कोटेश्वर, कलंकी, बालाजु, नयाँ बसपार्क लगायतका क्षेत्रबाट गाउँ फर्किनेहरू उल्लेख्य रहेका छन् ।
आज बिहानदेखि भक्तपुर अरनिको राजमार्ग हुँदै घर जानेहरुको भीडपनि बाक्लो छ। सुर्यविनायक हुँदै साँगा नाकामार्फत घर जाने सवारीको चाप भक्तपुरमा देख्न पाइरहेको छ।
नयाँ बसपार्कदेखि कोटेश्वर र कलंकीदेखि नागढुंगासम्म नै घर फर्किनेहरुको लर्को लागेको छ । दैनिक झन्डै एक लाखको हाराहारीमा यात्रुहरू काठमाडौँ उपत्यकाबाट बाहिरिने गरेको तथ्यांक काठमाडौं उपत्यका ट्राफिक प्रहरी कार्यालयसँग छ ।
कार्यालयका एसएसपी राजेन्द्रप्रसाद भट्टका अनुसार घटस्थापनापछि झन्डै ४ लाख ६५ हजार ९ सय ७७ बढी यात्रुले उपत्यका छाडेका छन् । अझै यो संख्या दशमीको दिनसम्म नै बढ्ने उपत्यका ट्राफिक प्रहरी कार्यालयले जनाएको छ । उनले भने, ‘शुक्रबार उपत्यकाका चारै नाकाबाट उपत्यका छाड्नेहरूको संख्या बढी छ । नाकामा ट्राफिक जाम पनि छ । तर उपत्यका भित्रका सडकमा भने ट्राफिक चाप भने कम छ ।’
Published Date: 20 October 2023
