काठमाडौँ, भदौ २६ । लिबियामा बाढीका कारण १ सय ५० जनाको मृत्यु भएको पुष्टि भएको छ । देशको पूर्वी क्षेत्रमा आँधीसँगै आएको बाढीले थुप्रै भौतिक संरचनामा क्षति पुर्याएको छ । आँधीले डेर्ना सहरमा दुईवटा ठूला बाँध भत्काउनुका साथै सयौं भवनहरू भत्काएको छ ।
पूर्वी लिबियाको स्वघोषित सरकारका प्रधानमन्त्री ओसामा हमादले करिब २ हजार मानिसको मृत्यु भएको आशंका गरेको अलजजिराको समाचारमा उल्लेख छ । साथै हमादले हजारौं मानिस हराइरहेको जानकारी दिएका छन् । तर कसले पुष्टि गरेको भन्नेबारे उनले विस्तृतमा भनेका छैनन् ।
लिबियाको सशस्त्र बलका प्रवक्ता अहमद अल मोसमारीले पत्रकार सम्मेलन गर्दै डेर्नामा मृतकको संख्या २ हजार नाघेको बताएका छन् । उनले ५ देखि ६ हजार मानिस हराइरहेको पनि बताएका छन् ।
बेंघाजीस्थित रेडक्रिसेन्टका प्रमुख काइस फाकेरीले डेर्नामा पानीको सतह ३ मिटर (१० फिट) सम्म बढ्नुका साथै कम्तीमा १ सय ५० जनाको मृत्यु भएको पुष्टि गरेका छन् । केही विज्ञहरूले भने सोमबार डेर्ना सहरमा ३ करोड घन स्क्वायर मिटरभन्दा बढी पानी सहरमा परेको थियो ।
बाढीसँगै सहरमा बिजुली र इन्टरनेटको लाइन काटिएको छ । घटनामा मृत्यु हुने र हराउनेहरूको संख्या यकिन नभए पनि मृतकको संख्या बढ्नसक्ने सरकारी अधिकारीहरूले जनाएका छन् ।
कतिपय प्रमाणित नभएका भिडियो फुटेजहरू सामाजिक सञ्जालमा सार्वजनिक भइरहेका छन् । जहाँ बाढीले मानिस बगाउँदै गरेको दृश्य र केही सवारी चालकहरू कारको छतमा बसेर उद्धारको पर्खाइ गरिरहेको दृश्य देखिन्छ ।
३ दशकसम्म शासन गरेका मुअम्मर गद्दाफीको २०११ मा हत्या गरिएपछि २०१४ देखि लिबिया दुई प्रशासनिक क्षेत्रमा विभाजित भएको थियो । सोमबारको प्राकृतिक विपदसँगै दुबै सरकारले तीन दिनको शोक मनाउने निर्णय गरेका छन् ।
Published Date: 12 September 2023
