मुम्बई, भदौ ३ । बलिउड अभिनेता सनी देओल अहिले ‘गदर–२’ को सफलताका कारण चर्चामा रहेका छन् । अघिल्लो शुक्रवारदेखि प्रदर्शनमा आएको यो फिल्मलाई दर्शकले अत्यन्त मन पराएका छन् । फलस्वरुप, यसले बक्स अफिसमा उत्कृष्ट प्रदर्शन गर्ने क्रम जारी छ ।
यसैबीच, सनी देओल तथा शाहरुख खानबीचको सम्बन्धको बारेमा पनि अहिले चर्चा भइरहेको छ । एक समय थियो, जतिबेला सनीले शाहरुखसंग १६ वर्षसम्म बोलचाल नै गरेका थिएनन् । यो कुराले बलिउडमा ठूलो चर्चा पाएको थियो ।
सन् १९९३ मा रिलिज भएको फिल्म ‘डर’ अत्यधिक हिट भएको थियो । उक्त फिल्मको प्रमुख भूमिकामा सनी देओलसहित जूही चावला र शाहरुख खान पनि थिए । शाहरुख खानको फिल्ममा नेगेटिभ भूमिका रहेको थियो । ‘डर’ बलिउडको सदाबहार फिल्म बन्न सफल भयो र फिल्मका सबै गीतहरु लोकप्रिय भए ।
उक्त फिल्ममा शाहरुखले गरेको उत्कृष्ट अभिनयलाई आज पनि दर्शकले प्रशंसा गर्छन् ।
यद्यपि, यही फिल्मको छायांकनको क्रममै सनी र शाहरुखबीच कोल्ड वार प्रारम्भ भएको थियो । एउटा च्याट शोमा सनीले आफ्नो र शाहरुखको काम दर्शकले मन पराएको बताएका थिए ।
‘तर मलाई स्टोरी लाइन ब्रीफ नगरिएकोमा रिस उठेको थियो । निर्माताले भिलेनको भूमिकालाई चम्किलो बनाउँदैछन् भन्ने कुरा मलाई थाहा थिएन, सनीको भनाइ छ ।
सनीलाई आफूसंग निर्माताले धोका दिएको अनुभव भयो र त्यही कारण उनले शाहरुख खान र डरका निर्मातासंग १६ वर्षसम्म कुराकानी नै गरेनन् ।
