सिआइबीद्वारा ललिता निवास प्रकरणको छानबिन प्रतिवेदन आज बुझाउने तयारी

काठमाडौं, भदौ ३ । नेपाल प्रहरीको केन्द्रीय अनुसन्धान ब्यूरो (सिआइबी)ले बालुवाटारस्थित ललिता निवास जग्गा हिनामिना प्रकरणको छानबिन प्रतिवेदन आज जिल्ला सरकारी वकिलको कार्यालयमा बुझाउने तयारी गरेको छ ।

यस घटनामा पूर्वप्रधानमन्त्री माधवकुमार नेपाल र डा बाबुराम भट्टराईको पनि संलग्नता रहेको आशंका भए पनि सिआइबीले उनीहरुको बयान नलिई अनुसन्धान प्रतिवेदन बुझाउने तयारी गरेको छ ।

सरकारी अभिलेखले सन् १९६४ मा ललिता निवास बालुवाटारमा ११४ रोपनी (५.८ हेक्टर) जमिन मुआब्जा दिएर अधिग्रहण गरेको देखाएको थियो । ललिता निवासमा २ सय ८४ रोपनी रहेको र त्यसबेला सबैलाई राष्ट्रियकरण गरिएको थियो । सो अवधिमा रुक्मा शमशेर राणालगायत विभिन्न व्यक्तिले जग्गा कब्जा गरेका थिए ।