मुम्बई, साउन २३ । बलिउड अभिनेता अक्षय कुमारको नयाँ फिल्म ‘ओ माई गड–२ (ओएमजी)’ यही शुक्रवारदेखि प्रदर्शनमा आउँदैछ ।
ओएमजी २ को चर्चा विभिन्न कारणले भइरहेको छ । यसैबीच यो फिल्मलाई लिएर भारतका साधु–सन्तहरु आक्रोशित भएका छन् । उत्तर प्रदेशका साधु–सन्तले आफ्नो प्रदेशमा फिल्म ओएमजी २ को प्रदर्शनमा प्रतिवन्ध गर्ने घोषणा गरेका छन् । महांकाल मन्दिरका पुजारी तथा सन्तहरु पनि फिल्म ओएमजी २ लाई लिएर आक्रोशित भएका छन् ।
लखनउका फायर ब्राण्ड सन्त मानिने प्रसिद्ध मन्दिर कोतवालेश्वर महादेव मन्दिरका सन्त महन्त विशाल गौड भन्छन् – ‘बलिउडका निमार्ताले फिल्मबारे जति विवाद हुन्छ, त्यति नै फिल्म चल्छ भन्ने कुरा बुझेका छन् । त्यसैले जानि–जानि फिल्ममा देवी–देवताको खिल्ली उडाइएको छ, किन भने हिन्दुहरु शान्त रहन्छन् । फिल्म ओएमजी २ बाट सेन्सर बोर्डले विवादित सीन र संवाद हटाएन भने उत्तर प्रदेशभरी नै फिल्म रिलिज गर्न दिइने छैन ।’
महाकाल मन्दिरका पुजारीहरुले पनि फिल्म निर्मातालाई आधिकारिक सूचना पठाएका छन् । यसका साथै उक्त सूचना अक्षय कुमार ,चन्द्र प्रकाश द्विवेदी, फिल्मका निर्देशक अमित राय तथा सेन्सर बोर्डका अध्यक्षलाई समेत पठाएका छन् । सूचनामा फिल्मको अपमानजनक दृश्य हटाउन र माफी माग्नका लागि भनिएको छ ।
फिल्ममा भगवान शिवलाई गलत तरिकाले देखाइएको उनीहरुको आरोप छ । फिल्ममा भगवान शिवले पसलबाट कचौरी किन्दै गरेको देखाइएको छ, जसकारण श्रद्धालु आहत भएका छन् । फिल्ममा त्यस्ता प्रकारको दृष्य स्वीकार्य नभएको उनीहरुको गुनासो रहेको छ ।
फिल्मलाई सेन्सरले ए सर्टिफिकेट दिएको छ । फिल्ममा यौन शिक्षाजस्ता विषयवस्तु समावेश गरिएकाले १८ वर्षभन्दा कम उमेरका बालबालिकाले यो फिल्म हेर्न पाउने छैनन् ।
