आँखा पाक्ने रोग: डाक्टरको सल्लाह बिना जथाभावि आँखामा औषधि प्रयोग नगरौं

काठमाडौँ, साउन २३ । पछिल्लो केही समयदेखि राजधानी काठमाडौंसहित नेपालका विभिन्न भूभागका अस्पतालहरुमा आँखा पाक्ने रोगको समस्या भएका विरामीको चाप बढ्न थालेको छ । अधिकांश आँखा अस्पतालहरुमा आँखा पाक्ने रोगको समस्या लिएर जाने बिरामीहरुको संख्या बढ्न थालेको छ ।

आँखा पाक्ने रोग सरुवा प्रकृतिको भएकाले यो छोटो समयमै एक व्यक्तिबाट अर्को व्यक्तिमा सरिरहेको छ । फलस्वरुप पछिल्लो केही दिनयता देशभरका अस्पतालहरुमा आँखा पाक्ने समस्या भएका बिरामीहरुको चाप बढेको हो । काठमाडौंस्थित तीलगंगा आँखा अस्पताल, नेपाल आँखा अस्पताल लगायत देशभरका अस्पतालहरुमा आँखा पाक्ने समस्या भएका बिरामीहरुको चाप बढेको छ ।

तीलगंगा अस्पतालमा कार्यरत बाल आँखा रोग विशेषज्ञ डा.सृजना अधिकारीले आँखा पाक्ने समस्या लिएर अस्पतालमा आउने बिरामीको संख्या बढिरहेको बताउँदै भाइरल इन्फेक्सन र ब्याक्टेरीयाको कारणले आँखा पाक्ने समस्या देखिने गरेको बताइन् ।

धेरैजसो आँखा रातो हुने र चिप्रा आउने समस्या भएका बिरामीहरु अस्पताल आउने गरेको डा.अधिकारीको भनाइ छ । डा.अधिकारीले यो वर्ष विगतको वर्षहरुभन्दा धेरै नै बिरामीहरु देखिएको बताइन् । डा.अधिकारीका अनुसार यो समस्यालाई एउटा भाइरल इन्फेक्सन नै मानिएको छ । आँखा पाक्ने ब्याक्टेरियाको कारणले पनि यो समस्या हुन्छ ।

यसैबीच, स्वास्थ्य तथा जनसंख्या मन्त्रालयले एउटा सूचना जारी गर्दै भाइरल कन्जक्टिभाइटिस संक्रमण हुँदा आत्तिनु नपर्ने जनाएको छ । यो रोग घरमै स्याहार गरे एकदेखि दुई हप्तामा आफैँ निको हुने स्वास्थ्य तथा जनसंख्या मन्त्रालयले बताएको छ ।

आँखामा संक्रमण हुँदा घरमा नै स्याहार गर्न सकिन्छ । तर आँखाका विरामीलाई स्याहार गर्दा केहि कुरामा ध्यान दिनु आवश्यक छ । त्यसका लागि तल दिइएको निम्न कुरामा ध्यान दिनु पर्छ :

बरफले आँखा सेक्दा आँखा बन्द गरेर र सफा रुमालमा राखेर सेक्नु पर्छ ।
आँखा मिच्नु हुँदैन, आँखामा पानी पनि छ्याप्नु हुँदैन ।
आँखा छोइसकेपछि साबुन पानीले मिचिमिचि राम्रोसंग हात धुनु पर्छ ।
प्रशस्त मात्रामा पानी र पोषिलो खाना खानु पर्छ ।
बाहिर घाममा जाँदा कालो चश्माको प्रयोग गर्नु पर्छ । काम नपरी घर बाहिर ननिस्कनु राम्रो हुन्छ ।
संक्रमित व्यक्तिले प्रयोग गरेका रुमाल, टावेल, सिरानी, तन्ना आदि हरेक दिन धुनु पर्छ ।
संक्रमित व्यक्तिले प्रयोग गरेको सामान अन्य व्यक्तिलाई प्रयोग गर्न दिनु हुँदैन ।
डाक्टरको सल्लाह बिना जथाभावि औषधि प्रयोग गर्नु हुँदैन ।
दृष्टि कम हुने लगायत आँखा सम्बन्धि समस्या बढेमा उपचारका लागि तुरुन्त डाक्टरलाई देखाउनु पर्छ ।