काठमाडौँ, साउन २२ । देशभर आँखा पाक्ने रोगको संक्रमण फैलिरहेको छ । जसकारण ठूलो संख्यामा बालबालिका, वयस्कदेखि वृद्धवृद्धा प्रभावित भएका छन । विशेषगरी सहरी क्षेत्रमा यसबाट प्रभावित हुनेहरूको संख्या तीव्र रुपमा बढिरहेको स्वास्थ्यकर्मीहरूले बताएका छन् ।
पछिल्लो साता आँखा पाक्ने संक्रमण अनपेक्षित रुपमा फैलिरहेको छ। आँखा चिलाउने, बिझाउने, सुन्निने , रातो हुने, धमिलो देख्ने लगायत समस्या भएमा आँखा पाकेको हुनसक्ने भन्दै परीक्षण गराएर उपचार गराउनुपर्ने स्वास्थ्यकर्मीहरूले सुझाव दिएका छन् ।
सरुवा रोग भएकाले कालो चस्माको प्रयोग गर्न पनि स्वास्थ्यकर्मीहरूले सुझाव दिने गरेका छन् । यस्तै आँखा रातो भएमा, चिलाउने समस्या देखिएमा, बिझाए जस्तो भएमा सफा र नरम कपडामा चिसो पानी प्रयोग गरेर सफा गर्न सकिने उनीहरूको सुझाव छ । यस वर्ष गर्मी मौसम सुरु भएसँगै देशभरका अधिकांश जिल्लामा आँखा पाक्ने संक्रमण बढ्दो क्रममा रहेको छ ।
