काठमाडौं, साउन १४ । प्रि सिजनको मैत्रीपूर्ण खेलमा बार्सिलोनाले चिर परिचित प्रतिद्वन्द्वी रियल म्याड्रिडलाई हराएको छ ।
अमेरिकामा सम्पन्न खेलमा बार्सिलोनाका लागि ओस्मान डेम्बेले, फेर्मिन लोपेज र फेरान टोरेसले १-१ गोल गरे । रियल भिनीसियस जुनिअरको पेनाल्टी क्रसबारमा लाग्दा बराबरी गर्ने अवसर चुकेको थियो । समग्रमा रियलको ५ प्रहारमा पोस्ट बाधक बन्यो ।
खेलको १५ औं मिनेटमा डेम्बेलेले बार्सिलोनालाई अग्रता दिलाएका थिए । पेड्रीले पेनाल्टी क्षेत्र भित्र उपलब्ध गराएको उत्कृष्ट पासलाई उनले फिनिस गरे ।
रियलले त्यसको ५ मिनेटपछि नै खेल बराबरी गर्ने अवसर पाएको थियो । तर भिनीसियस जुनिअरको शक्तिशाली पेनाल्टी क्रसबारमा लगेर फर्कियो । लगत्तै रियलका रोड्रीगोको फ्रिकिकलाई गोलरक्षक मार्क आन्दर टेर स्टेगनले विफल पारे ।
रियल म्याड्रिडको लगातार प्रहार पोस्ट र क्रसबारमा लाग्दा खेल १-० कै स्थितिमा कायम रहेको थियो । ८५ औं मिनेटमा लोपेजले बार्सिलोनाको अग्रता दोब्बर पारे । उनले पेनाल्टी क्षेत्र बाहिरबाट गरेको प्रहार सिधै गोल भएको थियो ।
८७ औं मिनेटमा भिनीसियसको अर्को प्रहार पोस्टमा लाग्दा रियल खेलमा फर्कन सकेन । इन्ज्युरी समयमा फेरान टोरेसले गोलरक्षकको गल्तीको फाइदा उठाउँदै जित पक्का गरे ।
