जलेश्वर, साउन ११ । बैंक डकैतीमा संलग्न रहेको आरोपमा एक भारतीय नागरिक पक्राउ परेका छन् ।
उनी बिहारका २० वर्षीय अजय कुमार साफी हुन्। उनी गत जेठ १६ गते महोत्तरीको महोत्तरी गाउँपालिका–२ स्थित एनएमबि बैंक लुटपाट गरी १५ लाख रुपैयाँ लुट्ने समूहमा रहेको आरोप छ ।
उनलाई बुधबार साँझ मटिहानी–८ स्थित नेपाल–भारत सीमा नाकाबाट पक्राउ गरिएको जिल्ला प्रहरी कार्यालय महोत्तरीका प्रवक्ता प्रहरी नायब उपरीक्षक दिलीपकुमार गिरीले जानकारी दिए ।
चोरीको मोटरसाइकलमा आएका चारदेखि पाँच जनाको मुखौटे गिरोहले बैंकका कर्मचारी र ग्राहकलाई बन्धक बनाएर बैंक लुटपाट गरेको हो । अपराध भएको दिनदेखि प्रहरीले मानव नेपाल प्रहरी विशेष निकाय, अन्तरराष्ट्रिय समन्वय र प्रविधिको सहयोगमा गिरोहको खोजी गरिरहेको छ ।
साथै प्रहरीले अपराधमा संलग्न अन्य अभियुक्तहरुको पहिचान गरी उनीहरुको पनि तिब्र खोजी गरिरहेको छ । उनीहरुलाई छिट्टै पक्राउ गर्ने प्रहरीको अपेक्षा रहेको प्रहरी निरीक्षक प्रकाश मल्लले बताए ।
