काठमाडौँ, साउन ५ । नेपाल राष्ट्र बैंकका गभर्नर महाप्रसाद अधिकारीले बजार शिथिल हुँदा बैंकहरुको कर्जा विस्तारमा कमी आएको बताएका छन् । अर्थ समितिमा मौद्रिक नीतिका विषयमा आयोजित छलफलका क्रममा बोल्दै गभर्नर अधिकारीले उक्त कुरा बताएका हुन् ।
उनले अघिल्लो आर्थिक वर्षमा निक्षेप राम्रो भए पनि कर्जा विस्तार कम भएको बताए । ‘कर्जाको मागमा कमी हुनुको प्रमुख कारण बजारमा समग्र मागमा कमी आउनु हो’ उनले भने । बैकिङ क्षेत्रमा असारमा तरलता राम्रो बढेको भन्दै उनले सीआरआर बाहेक नै करिब ८८ अर्ब तरलता प्रणालीमा रहेको बताए ।करिब ६० अर्ब राष्ट्र बैकले खिचेको उनले बताए ।
ब्याजदर अघिल्ला वर्षको तुलनामा केही माथि भए पनि पछिल्ला दिनमा घट्दो क्रममा रहेको उनको भनाइ छ । साथै, गभर्नर अधिकारीले बजेटका लक्ष्यहरु पूरा गर्ने गरी मौद्रिक नीति आउने बताएका छन् । बजेटले लिएको आर्थिक वृद्धिको लक्ष्य पूरा गर्ने गरी मौद्रिक नीति आउने उनले बताए ।
