प्रहरी जवानलाई पाता कसेर यातना दिएकोबारे छानबिन गर्न पाँच सदस्यीय समिति गठन

सिरहा, असार २७ ।  सिरहामा एक जना प्रहरी जवानलाई पाता कसेर (बाँधेर) यातना दिएको प्रकरण छानबिन गर्न पाँच सदस्यीय समिति गठन भएको छ । मधेश प्रदेश प्रहरी कार्यालय जनकपुरले आज (बुधबार) प्रहरी नायब उपरीक्षक (डीएसपी) ज्ञानकुमार महतोको संयोजकत्वमा पाँच सदस्यीय छानबिन समिति गठन गरेको हो । समितिमा प्रहरी निरीक्षक राजकुमार कार्कीलगायतका अधिकृतहरू रहेका छन् ।

सिरहामा एक जना प्रहरी जवानलाई चरम यातना दिएको भिडियो सार्वजनिक भएको थियो । जिल्ला प्रहरी कार्यायल सिरहामा कार्यरत प्रहरी जवान अनु रायलाई बाँधेर यातना दिएको भिडियो सार्वजनिक भएको हो । ड्युटी समय बढी भएको गुनासो गर्न जाँदा उनीमाथि यातना दिएको उनका आफन्तको भनाइ छ । मंगलबार दिउँसो प्रहरी निरीक्षक हेमन्त राईले कार्यालयमा बाँधेर राखेको पीडित प्रहरी जवानका आफन्तको आरोप छ ।

महोत्तरी घर भएका प्रहरी जवान राय यसअघि पनि निलम्बनमा परेका थिए । २०७५ सालमा प्रहरी जवानमा भर्ना भएका रायलाई २ वर्षअघि चोरीको आरोपमा सिरहामा नै हुँदा निलम्बन गरिएको थियो । यसअघि २०७८ सालमा सिरहाको लहानमा रक्सी चोरेको आरोपमा उनलाई निलम्बन गरिएको थियो । अहिले सार्वजनिक भएको भिडिओ सोमबार अपरान्हको हो ।

सिरहाका प्रहरी प्रमुख एसपी टेकुनन्न इवा लिम्बुका अनुसार राय सवारी चालक हुन् । तर रक्सी खाएर गाडी चलाउने गरेपछि उनलाई सवारी चालकबाट अन्य डीयूटीमा खटाउन थालिएको थियो । अहिले सार्वजनिक भएको भिडियोमा पनि प्रहरी अधिकारीले उनलाई रक्सी पिएको छस् ? भनेर सोधेको सुनिन्छ । तर उनले रक्सी नपिएको र रक्सी पिएको भए जागिर नै छाड्ने जवाफ दिएका छन् ।

सोमबार साँझ गस्तीमा जाने टोलीमा उनलाई पनि समावेश गरिएको थियो । ड्युटी खटाउने अधिकारीसँग उनी फिल्डमा गस्ती हालेको भन्दै बाझेको एसपी लिम्बुले बताए । त्यसपछि उनी यस्ता जागिर सागिर खान्न बरु मर्छु भन्दै प्रहरी अधिकारीलाई गाली गर्दै बाहिर गए । गेटमा ड्युटीमा रहेका प्रहरीले पनि उनलाई रोक्न सकेनन्। गेट बाहिर गएपछि उनलाई अरु प्रहरी गएर पक्राउ गरेका थिए ।

पक्राउ गरेपछि उनी सजिलै भित्र आउन नमानेपछि हतकडी लगाएर कार्यालय भित्र ल्याइएको थियो । सोमबार साँझ उनलाई हिरासतमा राख्ने तयारी गरेपछि उनको भिडियो खिचिएको थियो । भिडियो पनि अर्का प्रहरी जवानले नै खिचेका थिए । हिरासतमा राख्नुअघि स्वास्थ्य परीक्षण गरियो, तर उनले रक्सी खाएको भने रिपोर्टमा देखिएन । सोमबार उनलाई हिरासतमा राखिएको थियो । मंगलबार हिरासतबाट छाडेपछि उनी ब्यारेकमा (प्रहरी निवास) गए । त्यसपछि उनले आफ्नो भिडिओ खिच्ने जवानको मोवाइलबाट आफ्नोमा पठाएर आफन्तमार्फत उक्त भिडियो सार्वजनिक गरेका थिए ।